पोखरामा सिसी क्यामेरा जडान गर्न उद्योग वाणिज्य संघ सकारात्मक


Share This


नेपालबहस संवाददाता    83 Views

११ मंसिर, काठमाडौं । पोखरालेखनाथ महानगरको शान्ति सुरक्षाका लागि विभिन्न स्थानमा सिसी क्यामेरा जडान गर्ने सम्बन्धमा पोखरा उद्योग वाणिज्य संघद्वारा आइतबार आयोजित छलफलमा पोखरालेखनाथलाई स्मार्ट सिटीका रुपमा विकास गर्न सिसी क्यामेरा पहिलो आवश्यकता भएकामा जोड दिइएको छ ।

स्मार्ट सिटीको निर्माणका लागि सुरक्षा पहिलो चुनौती भएको बताउँदै कार्यक्रमका वक्ताले सिसी क्यामेरा जडानसँगै सुरक्षा व्यवस्थालाई प्रभावकारी बनाउन सकिने बताए ।

कार्यक्रममा कास्कीका प्रमुख जिल्ला अधिकारी तारानाथ अधिकारीले सुरक्षा नगरका लागि अक्सिजन जस्तै अपरिहार्य भएको बताउँदै सिसी क्यामेरा जडानले आपराधिक मानसिकता कमजोर बन्दै यसको न्यूनीकरणमा सहयोग पुग्ने विचार व्यक्त गरे ।

सिसी क्यामेरा जडानको अभियान सकारात्मक भएको उल्लेख गर्दै उनले यसलाई नतिजामुखी बनाउन सुझाव दिए ।

पोखरालेखनाथ महानगरपालिकाका प्रमुख मानबहादुर जिसीले स्मार्ट सिटीको अवधारणालाई साकार पार्न सिसी क्यामेराको जडान आवश्यक भएको बताए । उनले आफ्नो तर्फबाट निजी क्षेत्रसँग सहकार्य गर्दे सो क्षेत्रको विकासका लागि अहोरात्र खटिरहेको जानकारी दिए । पोखरालाई स्मार्ट सिटीको रुपमा विकास गर्न आन्तरिक तथा वाह्यपूजीको व्यवस्था मिलाएर आफ्नो कार्यकालमा एउटा हेर्नलायक नमूना सहरको रुपमा विकास गर्न आफुले सक्दो प्रयास गरिरहेको उनले बताए ।

सरोकार भएका निकायबीच सहकार्य गर्दै यस अभियानलाई साकार पार्दै लागिने बताउँदै उनले यसका प्राविधिक पक्षबारे बृहत् छलफल गरी अघि बढिने बताए ।

पोखरा उद्योग वाणिज्य संघका अध्यक्ष विश्वशंकर पालिखेले प्रारम्भिकरुपमा महानगरभित्र ५०० सिसी क्यामेरा जडान गर्ने सोच राखिएको र यसका लागि लगभग रु पाँच करोड लागत लाग्ने अनुमान गरिएको जानकारी दिए ।

सामाजिक उत्तरदायित्वअन्तर्गत यस अभियानमा संघ हातेमालो गर्दै अघि बढ्ने उनले बताए । नेपाल पत्रकार महासंघ कास्कीका अध्यक्ष दीपेन्द्र श्रेष्ठले पर्यटकीय नगरी पोखराका लागि सुरक्षा प्रमुख चुनौती भएको बताउँदै सिसी क्यामेरा जडानसँगै यसलाई कसरी दिगो व्यवस्थापन गर्नेतर्फ बेलैमा सोच्नुपर्नेमा जोड दिए ।

तपाईको प्रतिक्रिया

सम्बन्धित समाचार