राष्ट्रपति भण्डारीले आज राष्ट्रसंघको उच्चस्तरीय बैठकलाई सम्बोधन गर्दै

काठमाडाैं : राष्ट्रपति विद्यादेवी भण्डारीले आज संयुक्त राष्ट्रसंघीय आयोग ‘सीएसडब्ल्यू’ को ६३ औँ अधिवेशनलाई सम्बोधन गर्दैछिन् । अमेरिकाका न्यूयोर्कमा सोमबारदेखि जारी अधिवेशनका क्रममा भण्डारीले आज ‘शक्तिमा नारी’ विषयको उच्चस्तरीय बैठकलाई सम्बोधन गर्न लागेकी हुन् ।

नारी नेतृत्वले विश्वलाई कसरी परिवर्तन गर्न सक्छ भन्ने विषयमा राष्ट्रपति भण्डारीले धारणा राख्ने राष्ट्रसंघका लागि नेपालको स्थायी नियोगले जानकारी दिएको छ ।

राष्ट्रपतिले समसामयिक विश्वका चुनौतीलाई सामना गर्न नारी नेतृत्वको महत्व र आवश्यकतामा केन्द्रीत रहेर मन्तव्य दिने बताइएको छ । राष्ट्रपति भण्डारीले भोलि २०१९ मा महिलाको अवस्था परिषदको बैठकलाई नेपालको तर्फबाट सम्बोधन गर्ने कार्यक्रम छ । अधिवेशनमा भाग लिन भण्डारी सोमबार न्यूयोर्क पुगेकी हुन् ।