‘पत्रकारिता राष्ट्र र नागरिकप्रति उत्तरदायी र सामाजिक सञ्जाल व्यक्तिगत’
काठमाडौं । सञ्चार तथा सूचना प्रविधिमन्त्री गोकुलप्रसाद बाँस्कोटाले सूचना प्रविधिसम्बन्धी विधेयक अभिव्यक्ति स्वतन्त्रताविरुद्ध नभई डिजिटल माध्यमलाई व्यवस्थित गर्न ल्याउनुपरेको बताएका छन् ।
संसदीय मामिला पत्रकार समाज र प्रविधि पत्रकार मञ्चले आइतबार सिंहदबारमा संयुक्तरुपमा आयोजना गरेको ‘सूचना प्रविधि सम्बन्धमा व्यवस्था गर्न बनेको विधेयक’का विषयमा सरोकारवालासँग अन्तक्र्रियामा उनले डिजिटल माध्यमलाई व्यवस्थित गर्न सो विधेयक ल्याएको स्पष्ट पारे ।
सामाजिक सञ्जाल दर्ता गर्नुपर्ने र स्वदेशी वा विदेशी कम्पनी करको दायरामा आउनुपर्ने धारणा
मन्त्री बाँस्कोटाले सामाजिक सञ्जाललाई दर्ता गरेर नियमन गरिने व्यवस्था पनि सो विधेयकमा रहेको उल्लेख गरे । डिजिटल नेपाल निर्माणमा पनि सूचना प्रविधिको क्षेत्र एउटा मुख्य आर्थिक केन्द्र बन्नसक्ने भन्दै उनले विश्वभरि नै दर्ता गरेर सामाजिक सञ्जाल चलाउने र राज्यलाई कर दिर्ने व्यवस्था भएको बताए ।
मन्त्री बाँस्कोटाका अनुसार फेसबुकले ३५ देशको ४२ वटा कार्यालय खोलेको छ । गुगलले ४० देशमा कार्यालय खोलेको छ । मन्त्री बाँस्कोटाले सामाजिक सञ्जाल कम्पनीले सामाजिक सञ्जाल दर्ता गर्नुपर्ने र स्वदेशी वा विदेशी कम्पनी करको दायरामा आउनुपर्ने धारणा राखे ।
मन्त्री बाँस्कोटाले पत्रकारिता र सामाजिक सञ्जाल एउटै कुरा नभएको उल्लेख गर्दै पत्रकारिता राष्ट्र र नागरिकप्रति उत्तरदायी हुने र सामाजिक सञ्जाल व्यक्तिगत हुनेसमेत बताए ।
विधेयकका विषयमा सांसद तथा वरिष्ठ अधिवक्ता रामनारायण विडारी र अधिवक्ता सन्तोष सिग्देलले कार्यपत्र प्रस्तुत गरेका थिए । उक्त विधेयक विकास तथा प्रविधि समितिमा छलफलका क्रममा छ ।
