देशभरका पत्रकार जागे ,सरकारबिरुद्ध जिल्ला प्रशासन कार्यालयमा धर्ना

काठमाडौं । “पत्रकारिता साइबर अपराध होइन, बिद्युतिय कारोबार ऐनको दफा ४७ र ४८ खारेज गर ,प्रेसमाथिका सबै खाले ज्यादती बन्द गर,प्रेस स्वतन्त्रताको ग्यारेण्टी गर ,पत्रकार अजुन गिरीलाई तत्काल रिहा गर ” लगायतका नारा लगाउदै नेपाल पत्रकार महासंघको अगुवाईमा आज देशभरका जिल्ला प्रशासन कार्यालयमा पत्रकारहरुले धर्ना दिई बिरोध जनाएका छन् ।

सरकार संविधानले ग्यारेण्टी गरेको पूर्ण प्रेस स्वतन्त्रता बिरोधी हर्कतमा लागेको भन्दै देशैभरका पत्रकारहरु यतिबेला सरकारका प्रेस बिरोधी गतिबिधि तत्काल सच्याउन माग गर्दै जुर्मुराएका हुन् । आज जिल्ला शाखाको अगुवाइमा पत्रकारहरुले जिल्ला प्रशासन कार्यालय अगाडि धर्ना दिदै समाचार लेखेकै आधारमा पत्रकार पक्राउ गर्नु सरकारको प्रेस स्वतन्त्रताबिरोधी कदम भन्दै बिरोध जनाएका छन् ।

अनलाइनमा प्रकाशित समाचारलाई लिएर पक्राउ परेका पोखराका पत्रकार अर्जुन गिरीविरुद्ध साइबर क्राइम मुद्दा दर्ता भएपछि पत्रकारहरुले त्यसको चर्को बिरोध गरेका छन् ।

सरकारले ठगलाई पक्राउ गरि कानुनी कारबाही गर्नुपर्नेमा उल्टै ठगीको समाचार लेख्ने पत्रकारलाई पक्राउ गर्नु लज्जास्पद भएको पत्रकार तथा नागरिक समाजको भनाई छ । पत्रकार गिरीलाई सीआईबीले गत सोमबार साइबर क्राइमअन्तर्गत पक्राउ गरेको थियो । बतास अर्गनाइजेसनका सञ्चालक सदस्य विपेन्द्रराज बतासको उजुरीको आधारमा पत्रकार गिरी पक्राउ परेका हुन । बतासले पोखराकै दुई व्यापारीलाई करोडौं ठगी गरेको बिषयमा पत्रकार गिरीले समाचार लेखेका थिए । ठगिएका ती दुई व्यापारीले बतासबिरुद्ध कास्की प्रहरीमा उजुरी दिएका थिए ।

पत्रकार महासंघलगायतका विभिन्न संघसंस्थाले सरकारको यस कदमलाई प्रेस स्वतन्त्रता बिरोधी गतिबिधि भन्दै गल्ती सच्याउन माग गरेका छन् । दवावका लागि बिहीबार देशभरका जिल्ला प्रशासन कार्यालयमा धर्ना दिएको महासंघले थप संघर्षका कार्यक्रम ल्याउने तयारी गरेको छ ।