‘ललिता निवासको जग्गा सरकारी बाहेक अन्यको हुनै सक्दैन’ : सभापति देउवा

बिर्तामोड । नेपाली कांग्रेसका सभापति शेरबहादुर देउवाले ललिता निवासको जग्गामा व्यक्तिको नाम जोड्न नमिल्ने बताएका छन् ।

उनले ललिता निवासको जमिन सरकारले अधिग्रहण गरिसकेको स्पष्ट पार्दै जग्गामा व्यक्तिको नाम जोड्न नमिल्ने बताएका हुन् । पूर्व प्रधानमन्त्रीसमेत रहेका देउवाले अधिग्रहण गरेको जमिन सरकारी बाहेक अन्यको हुनै नसक्ने दाबी गरेका छन् ।

उनले उक्त जमिन सरकारी नभए सुवर्ण शम्शेरको छोरा-नातिको हुनुपर्ने जिकिर गरे । ‘प्रधानमन्त्री निवास, बालुवाटारको ललिता निवास र सभामुख निवास रहेको जमिन सुवर्ण शम्शेरको हो । सरकारले उक्त जमिन अधिग्रहण गरेर प्राप्त गरिसकेको छ’ देउवाले भने ।

देउवाले पार्टी विधानअनुसार बाँकी रहेका समितिहरु सबैको सहमतिमै गठन गर्ने बताए । उनले संघीय संरचनाअनुसार गठन गर्न बाँकी प्रदेशलगायत समितिहरु पार्टीभित्रका सबै पक्षको सहमतिमै गठन गरेर अघि बढ्ने विश्वास दिलाए । तर, पार्टी विधानअनुसार गठन गर्न बाँकी सबै समितिहरु आगामी महाधिवेशन अगावै गर्ने कि अहिलेकै अवस्थामा अघि बढ्ने भन्नेबारे अहिले नै आफूले केही भन्न नसक्ने बताए ।

‘विधानअनुसार समितिहरु गठन गर्न जरुरी छ । ती समितिहरु गठन गर्दा सबैलाई समेटेरै गठन गर्ने हो । तर, समितिहरु महाधिवेशन अगावै गठन गर्ने कि महाधिवेशनसम्म यसरी नै अघि बढ्ने भन्ने कुरा संक्रमणकालिन अवस्थामा रहेकाले अहिले नै यो विषयमा म केही भन्दिन ।’