संघीय संसदको चौथो अधिवेशन आजबाट सुरु हुँदै

काठमाडौँ । आजबाट संघीय संसदको चौथो अधिवेशन सुरु हुँदैछ । संघीय संसद्का दुवै सदनका बैठक आज अपराह्न ४ बजे बस्ने भएको हो । वर्षे अधिवेशनको पहिलो दिन औपचारिक सुरुआत र केही शोक प्रस्ताव पारित गरिने व्यवस्थापिका संसद् सचिवालयले जनाएको छ ।

पहिलो बैठकमा राष्ट्रपतिबाट अधिवेशन बोलाएको सम्बन्धी पत्र पढेर सुनाउने कार्यसूची छ । हिउँदे अधिवेशनपछि निधन भएका तीन पूर्व सांसदप्रति शोक प्रस्ताव पारित गर्ने कार्यसूचि निर्माण गरिएको हो । यस्तै, बैठकमा दुवै सदनमा सत्तारुढ र विपक्षी दलका नेताले सम्बोधन गर्ने सम्भावना पनि छ ।

सचिवालयले यस अधिवेशनमा सरकारले नीति तथा कार्यक्रम, बजेट लगायतका विधेयक पेश गर्ने तयारी गरेको जनाएको छ । यता, प्रतिपक्षी कांग्रेसले भने यसमा विमति जनाएको छ । गत वर्ष नीति तथा कार्यक्रमअघि प्रि–बजेट छलफल गरिएको थियो ।

सरकार र संसद् सचिवालयबीच पछि छलफल गर्ने सहमति भएको सभामुख कृष्णबहादुर महराले जानकारी दिए । राष्ट्रपति विद्यादेवी भण्डारीले वैशाख २० गते नीति तथा कार्यक्रम प्रस्तुत गर्ने तय भएको छ ।