मिडिया काउन्सिल विधेयकको विरोधमा १ घ‍ण्टा रोए पत्रकार

मोरङ। आजभोली सरकारलाई खबरदारी गर्न गरिने आन्दोलनले नयाँ नयाँ रुप लिएको छ । यसैको एक उदाहरण हो सरकारले संसदमा दर्ता गराएको मिडिया काउन्सिल विधेयक विरोधमा मोरङका पत्रकारले गरेको आन्दोलन । उनीहरुले आन्दोलनको प्रकृतिलाई विशुद्ध नौलो रुपमा प्रस्तुत गरेका छन् ।

सरकारले ल्याएको विधेयक पारित भए पत्रकार रुनुपर्ने अवस्था आउनेभन्दै खबरदारी स्वरुप आजको विरोध प्रदर्शनमा रोएर व्यांगात्मक विरोध गरेको प्रदर्शनमा सहभागी प्रेस युनियन मोरङका अध्यक्ष कुमार लुईटेलले बताए ।

नेपाल प्रेस युनियन मोरङ शाखाले आयोजना गरेको रुने कार्यक्रममा सहभागी पत्रकारले डाको छाडेर १ घण्टासम्म रोएका थिए ।

पत्रकारको लेख्न, बोल्न र दृश्य देखाउन पाउने अधिकारमाथि नै धावा बोलेर सरकारले नियन्त्रण गर्न खोेजेको भन्दै अध्यक्ष लुइटेलले भने, ‘विधेयक पारित भए, पत्रकारलाई यथार्थमै रुने अवस्था सिर्जना हुनेछ ।’

सरकारले सञ्चार माध्यमलाई नियमन गर्ने भन्दै ल्याएको मिडिया काउन्सिल विधेयक नियमनका लागि नभई नियन्त्रण मुखी हुने आन्दोलनरत पत्रकारको आरोप छ ।