प्रहरी भन्छ, ‘बम विष्फोटका घटनामा विप्लवको संलग्नता छ’

काठमाडौं । उपत्यकामा भएका बम विष्फोटका घटनामा नेत्रविक्रम चन्द विप्लव नेतृत्वको नेकपाको संलग्नता रहेको नेपाल प्रहरीले दाबी गरेको छ ।

प्रहरीका केन्द्रीय प्रवक्ता एवम् डिआइजी विश्वराज पोख्रेलले आइतबार उपत्यकामा भएका बम विष्फोटका घटनामा सोही पार्टीका कार्यकताहरु संलग्न रहेको बताएका हुन् ।

उनले विष्फोटमा परेर मृत्यु हुने र घाइतेहरु समेत नेकपाकै कार्यकर्ता रहेको जानकारी दिए । प्रवक्ता पोख्रेलले यस्ता घटनाबाट कोही पनि विचलित हुन नहुने बताउँदै नपाल प्रहरी स्थितिलाई नियन्त्रणमा लिन सक्षम रहेको समेत प्रस्ट पारे । उनले नेपाल प्रहरी मातहतका सबै इकाइलाई हाइ अलर्टमा बस्न निर्देशन दिइएको समेत बताए ।

आइतबार काठमाडौंको सुकेधारा र अनामनगरमा भएको बम विष्फोटमा परेर ३ जनाको मृत्यु भएको थियो भने आधा दर्जनको हाराहारीमा घाइते भएका थिए । काठमाडौं र ललितपुरका विभिन्न स्थानमा बम भेटिएको थियो ।