सरकारसँग काम गर्ने क्षमता छैन, हावामा बजेट : सभापति देउवा

काठमाडौं । प्रमुख प्रतिपक्षी दल नेपाली कांग्रेसले बजेट वितरणमुखी भएको टिप्पणी गरेको छ । कांग्रेस सभापति शेरबहादुर देउवाले स‌ंसद भवनमा संचारकर्मीलाई प्रतिक्रिया दिँदै वितरणमुखी बजेटमा नयाँ कुरा केही नभएको बताए ।

बजेटलाई हावादारीको शंज्ञा दिदै उनले बजेटलाई हावामा गफ दिएको टिप्पणी गरे। अर्थमन्त्री डा युवराज खतिवडाले आज ‘बुधबार’ संघीय संसदमा प्रस्तुत गरेको आगामी आर्थिक वर्ष २०७६/७७ को बजेट संसदमा सार्वजनिक गरेपछि देउवाले यस्तो टिप्पणी गरेका हुन् ।

उनले भने,‘सरकारसँग काम गर्ने क्षमता छैन, खर्च गर्ने क्षमताविनै कार्यक्रमहरु राखिएकाले कार्यान्वयन हुन सक्दैन।त्यस्तै का‌ंग्रेसका नेता डा मिनेन्द्र रिजालले सरकारको बजेटमा पूँजीगतखर्च बढाउने कुनै आधार नरहेको टिप्पणी गरे।

त्यस्तै समाजवादी पार्टी नेपालका अध्यक्ष डा बाबुराम भट्टराईले बजेट कार्यान्वयनमा आशंका व्यक्त गरे। उनले भने, बर्तमान सरकारले पपुलर बजेट ल्याउन खोजेको मात्र देखियो । त्यस्तै राजपाका नेता लक्ष्मणलाल कर्णले अधिकार र बजेट फेरी पनि केन्द्रिकृत गर्न खोजिएको तर्क गरे।