मोदीको शपथ आज, ओली नयाँ दिल्ली प्रस्थान, सुरक्षा व्यवस्था कडा

काठमाडौं । आज भारतको राजधानी नयाँ दिल्लीको सुरक्षास्थिति कडा पारिएको छ । प्रधानमन्त्री पदमा आजैबाट नरेन्द्र मोदीको दोस्रो इनिङ सुरु हुँदै छ ।

सन् १९७५ पछि लगातार पूर्ण बहुमतको सरकार बनाउने कीर्तिमान इन्दिरा गान्धीपछि मोदीलाई जुरेको छ । स्थानीय समय अनुसार, साँझ ७ बजे राष्ट्रपति भवनमा आयोजित भव्य कार्यक्रममा मोदीको दोस्रो कार्यकालको शपथ हुुँदैछ ।

कार्यक्रममा करिब आठ हजारको सहभागिता रहने जनाइएको छ । त्यही भीडमा नेपालका प्रधानमन्त्री कमरेड खड्गप्रसाद शर्मा ओली अतिथिका रुपमा भाग लिंदै दिल्ली प्रस्थान गरेका छन् ।

छिमेकी भारतमा भारतीय जनता पार्टीले प्रचण्ड बहुमत ल्यायो गएको चुनावमा । भारतीय कांग्रेसको लज्जास्पद हारका बीच मोदी लहरले सबै बगाइदिएको छ । गान्धी परिवारको पेवा जस्तो रहेको उत्तर प्रदेशको अमेठी सिटबाट कांग्रेस अध्यक्षसमेत रहेका प्रधानमन्त्रीका दावेदार राहुल गान्धीको हालत निरीह बन्यो ।

उनले लाजमर्दाे हारको सामना गर्नु प¥यो । केरलाको वायनादबाट भने उनी विजयी भएका छन् । उनी आज साँझ मोदीको शपथग्रहण कार्यक्रममा सहभागी हुने भारतीय सञ्चारमाध्यमले जनाएका छन् ।

आज हुने शपथग्रहण कार्यक्रमलाई विशेष बनाउन भारतीय सरकारले छिमेकी मुलुकका सरकार प्रमुखलाई निम्त्याएको छ । यस अघि पनि मोदीले आफ्नो पहिलो कार्यकालमा छिमेकी मुलुकका सरकार प्रमुखलाई निम्त्याएका थिए । तर यसपाला अलि भिन्न बनाउन खोजिएको छ ।

छिमेकी पाकिस्तानसँगको शत्रूतापूर्ण व्यवहार सतहमा नै आउने गरी पाकिस्तानलाई निषेध गर्न खोजिएको सन्देश दिइएको छ । मोदीले यस प्रयोजनका लागि सार्क राष्ट्र प्रमुख भन्दा विमस्टेकलाई रोजे ।

बहुपक्षीय प्राविधिक तथा आर्थिक सहयोगका लागि बंगालको खाडी अर्थात विमस्टेक छान्दा पाकिस्तान छल्न सजिलो हुने भयो । सन् २०१४ मा भने सार्क राष्ट्रका सरकार प्रमुखलाई निम्त्याउँदा तत्कालिन पाकिस्तानी प्रधानमन्त्री नवाज सरिफ दिल्ली पुगेका थिए ।

कुरो पाकिस्तानलाई निम्त्याउने वा छल्ने भन्ने मात्र होइन, नियतको हो । भारत पाकिस्तानबीचको मतभेद आजको होइन । मुलुक टुक्रिएदेखि नै काश्मिर विवाद रहीआएको छ ।

यो समस्या भन्दा पनि राजनीति गर्ने मसलाका रुपमा दुबै मुलुकले प्रयोग गरिरहेका आपसी मनमुटवा र विभेदलाई । राष्ट्रवादको चर्काे नारा उरालेर मतदाताको मन जित्ने हतियारका रुपमा प्रयोग हुँदै आएको छ ।

यही मुद्धा देखाएर राष्ट्रभक्तिको गीत गाउने र चुनावमा आफ्नो वर्चश्व कायम राख्ने रणनीति दुबै मुलुकका नेतामा रहेको छ । पार्टी र नेताका लागि सत्ताको भ¥याङ बनेको छ काश्मिर मुद्धा । भारतले पाकिस्तानलाई निम्त्याएर अहिले एउटा सकारात्मक सन्देश दिन सक्थ्यो । तर त्यो आवश्यक देखेनन् मोदीले । यसका पछाडि पनि सत्ता स्वार्थ लुकेको बुझ्न सकिन्छ ।

भारत पाकबीचको मतमतान्तर र विभेद सदाका लागि अन्त्य होस् भन्ने दुबै मुलुकका नेताहरु चाहँदैनन् । यही मुद्धा देखाएर मतदातालाई बेवकूफ बनाउने अभियानको निरन्तरता मात्र हो यो प्रकरण पनि ।

विगत झैं पाकिस्तानी समकक्षीलाई निम्ता गरेको भए जनताको तहमा सकारात्मक सन्देश प्रवाह हुन सक्थ्यो । त्यो पक्षमा मोदीको रुचि देखिएन । यद्यपि शपथग्रहण कार्यक्रम केवल देखाउने दाँत मात्र हुन्थ्यो । नेताहरुबीच खासै ठोस वार्ता हुने वा परिणाम निस्कने कुरा थिएन । तर यो अवसर जुटाउन भारतले नचाहनुका पछाडि सत्ता राजनीति नै भएको जानकारको दावी छ ।

जहाँसम्म नेपाली प्रधानमन्त्रीको सहभागिताको कुरा छ , यसले भारतको नेपाल नीति विगतभन्दा फरक नहुने भन्ने जानकारी दिन खोजेको आभाष दिएको छ । भोलि शुक्रबार विहान मोदीले नेपाली समकक्षी ओलीसँग ब्रेकफास्ट टक गर्ने भएका छन् ।

वार्ता अनौपचारिक भएपनि ओलीका लागि भने ठूलो उपलव्धि हुने छ । जे भएपनि भारतले नेपालसँग विगतभन्दा असल सम्वन्ध राख्न चाहेको सन्देश भने दिन खोजेको छ । यसलाई सकारात्मक रुपमा लिन सकिन्छ ।