सांसदहरुलाई छुट्ट्याइएको बजेट विरोधभन्दा पनि दुरुपयोग : अर्थमन्त्री खतिवडा

काठमाडौं । अर्थमन्त्री युवराज खतिवडाले सांसदहरुलाई छुट्ट्याइएको बजेटको विरोधभन्दा त्यसको दुरुपयोग हुनेमा सचेत रहन सरोकारावाला सबैलाई आग्रह गरेका छन् ।

नयाँ आर्थिक वर्ष २०७६–०७७ को बजेट प्रस्तुत गरेको भोलिपल्ट बिहीबार सिंहदरबारमा आयोजित पत्रकार सम्मेलनमा बजेटको ब्रिफिङ गर्दै अर्थमन्त्री खतिवडाले जनप्रतिनिधिलाई विकासबाट विमुख गर्नु लोकतन्त्रमा राम्रो संकेत नजाने भन्दै सरकारको बचाउ गरे ।

उनले जनप्रतिनिधिको सहभागिताबिना विकास असम्भव हुने समेत दाबी गरे । सांसदहरुलाई योजना छनोट गर्न र अनुगमनको अधिकारसहित बजेट छुट्याउने परम्परामा सांसदलाई पैसा बाँडे भन्ने भ्रम फैलाइएको भन्दै उनले असन्तुष्टि व्यक्त गरे ।

अर्थमन्त्री खतिवडाले बजेटले आगामी आर्थिक वर्ष भित्र ७० वटा जिल्लालाई पूर्ण साक्षार जिल्लाको रुपमा घोषणा गर्न ५ अरव बजेटको व्यवस्था गरेको पनि स्मरण गराए । त्यसैगरी स्वास्थ्य क्षेत्रको विकासका लागि २२ प्रतिशत बजेट पु¥याइएको बताए ।

अर्थमन्त्री खतिवडाले बजेटले मौलिक हकसँग सम्बन्धित रोजगारीको समस्या समाधानका लागि प्रधानमन्त्री रोजगार कार्यक्रमलाई प्राथमिकता दिइएको पनि बताए ।

खतिवडाले लोकप्रियतावादी (पपुलिस्ट) बजेट ल्याएको स्वीकार गरे । १५ खर्ब ३२ अर्बको बजेट ल्याउँदा सरकारले सामाजिक सुरक्षा भत्ता, तलब बृद्धि गर्नुका साथै सांसदलाई ६ करोड दिने लगायतका वितरणमुखी कार्यक्रम समावेश गरेको छ ।