प्रहरी युनिटहरुमा ३ सय ३० थान मोटरसाइकल, देशैभर कहाँ के भयो ? थाहा पाउनुस्

“एक प्रहरी चौकी एक सवारी साधन” नीति अनुरुप मोटरसाइकल वितरण :

काठमाडौं । “एक प्रहरी चौकी एक सवारी साधन” नीति अनुरुप प्रहरी प्रधान कार्यालयले देशमा थप शान्ति सुरक्षा कायम गर्ने उद्धेश्यका साथ विभिन्न प्रहरी युनिटहरुमा ३ सय ३० थान मोटरसाइकल वितरण गरेको छ । नागरिकको चाहना अनुसार अपराधमुक्त समाज निर्माण गर्नका लागि प्रहरीलाई साधनस्रोत युक्त बनाउन उक्त मोटरसाइकल वितरण गरिएको हो ।

समाजमा शान्ति सुरक्षा कायम गरी कुनैपनि घटना घटे पश्चात् तत्काल प्रहरी उपस्थितिलाई थप सहज बनाई घटनास्थलको सुरक्षा गरी प्रमाण संकलन गर्न, निष्पक्ष अनुसन्धान गरी कानुन कार्यान्वयन गर्न, प्रभावकारी रुपमा गस्ती गरी प्रहरी कार्यलाई चुस्त दुरुस्त बनाउन यस नीतिले सहयोग पुर्‍याउने विश्वास लिइएको छ । नेपाल सरकारको नीति कार्यक्रम तथा बजेट कार्यान्वयन कार्ययोजना अन्तर्गत उल्लेख भए अनुसार “एक प्रहरी चौकी एक सवारी साधन” वितरण कार्यक्रमलाई निरन्तरता दिने प्रयोजनार्थ प्रहरी प्रधान कार्यालयबाट खरिद भएको उक्त मोटरसाइकलहरु वितरण गरिएको हो ।

हालसम्म सरकारी सवारी साधन उपलब्ध नभएको जिल्ला डोल्पाको जिल्ला प्रहरी कार्यालय र सो मातहत ईलाका प्रहरी कार्यालय खदाङ्ग, प्रहरी चौकी त्रिपुराकोट र प्रहरी चौकी कालागौडामा समेत गरी ४ थान मोटरसाइकल उपलब्ध गराइएको छ ।

 बालकको हत्या गरेको अभियोगमा पक्राउ  :

धनुषा मिथिला नगरपालिका-६ बस्ने शम्भु कुमार साहको करिब साढे २ वर्षीय छोरा आर्यन भन्ने समिर कुमार साहको गत वैशाख २४ गते हत्या गरेको अभियोगमा सोही नगरपालिका-६ बस्ने ५५ वर्षीय शत्रुधन महतोलाई उनकै घरबाट बुधबार प्रहरीले पक्राउ गरेको छ ।

गत वैशाख २३ गते समिर कुमार हराएको भन्ने ईलाका प्रहरी कार्यालय ढल्केवरमा खबर प्राप्त हुनासाथ खटिएको प्रहरीले खोजी गर्ने क्रममा वैशाख २४ गते साँझ सोही नगरपालिकास्थित बालकको घरबारी नजिकै झाडीमा धारिलो हतियारले कर्तव्य गरी मारेको अवस्थामा शव फेला परेको थियो ।

प्रारम्भिक अनुसन्धानको क्रममा मृत बालकका बाबु शम्भु कुमार तथा आमा रेणु देवी साह घाँस काट्न गएको अवस्थामा शत्रुधन महतोले खेलिरहेका समिर कुमारलाई ललाईफकाई अपहरण गरी आफनो घरमा बन्धक बनाई राखेको र वैशाख २४ गते बिहान शत्रुधन महतोले गर्ने गरेको धामी झाँक्रीको काममा दखल बढाई शक्तिशाली हुने अन्धविश्वासमा परी देवीदेउताको नाममा नरवलीको रुपमा नियतपूर्वक आफ्नै घरआँगनमा धारिलो हतियारले कर्तव्य गरी मारी शव झाडीमा फालेको खुल्न आएको छ ।

हाल निज शत्रुधन महतोका विरुद्ध अपहरण तथा कर्तव्य ज्यान मुद्धा अन्तर्गत सम्मानित जिल्ला अदालत धनुषाबाट पहिलो पटक दिन ७ को म्याद थप गरी प्रहरीले थप अनुसन्धान गरिरहेकाे जानकारी दिएकाेछ ।

समुदाय-प्रहरी साझेदारी अवधारणा अन्तर्गत विभिन्न कार्यक्रम सम्पन्न :

कास्की, समुदाय-प्रहरी साझेदारी अवधारणा अन्तर्गत लागूऔषध नियन्त्रण, आकस्मिक नम्बरको प्रयोग, आधारभूत सुरक्षा, साईबर अपराध तथा सडक सुरक्षा सम्बन्धी प्रशिक्षण बुधबार सम्पन्न भएको छ । पोखरा महानगरपालिका-३० शिसुवास्थित न्युलाईट अंग्रेजी बोर्डिङ स्कुलको सभाहलमा ९ र १० का विद्यार्थीहरुलाई उक्त प्रशिक्षण दिइएको हो । कार्यक्रममा शिक्षक, अभिभावक, विद्यार्थी तथा स्थानीय प्रहरीको उपस्थिति रहको थियो ।

यसैगरी समुदाय-प्रहरी साझेदारी अवधारणा अन्तर्गत पोखरा उद्योग बाणिज्य संघको सभा हलमा जिल्ला प्रहरी कार्यलय कास्कीका प्रमुख प्रहरी उपरीक्षक ओम बहादुर रानाको प्रमुख आतिथ्यमा कानुन सम्बन्धी व्यवहारिक ज्ञान र बाल मनोविज्ञान सम्बन्धी प्रशिक्षण बुधबार सम्पन्न भएको छ ।

समुदायिक सेवा एवं सामुदायिक प्रहरी सेवा जिल्ला समन्वय समिति कास्कीको आयोजनामा तथा जिल्ला प्रहरी कार्यलय कास्की, सामुदायिक सेवा एवं सामुदायिक प्रहरी सेवा केन्द्रहरु पृथ्वीचोक, बैदाम, बगर, माटेपानी, लेखनाथ, कालिका र हेम्जाको सहकार्यमा अधिवक्ता सुरेन्द्र थापा मगर तथा मनोवैज्ञानिक परामर्शदाता डा. शुशिल कंडेलले उक्त प्रशिक्षण दिनुभएको हो ।

कार्यक्रममा क्रियाशील सामुदायिक प्रहरी सेवा केन्द्रका पदाधिकारीहरु, स्थानीय संघसंस्थाहरु, विद्यालय, टोल विकास संस्थाका प्रतिनिधिहरु लगायतको उपस्थिति रहेको थियो ।

खुकुरी प्रहारबाट मृत्यु :

ईलाम नगरपालिका-१२ साङ्रुम्बा बस्ने ४० वर्षीय सुक बहादुर भन्ने पूर्ण बहादुर लिम्बुको खुकुरी प्रहारबाट मृत्यु भएको छ । सोही ठाउँ बस्ने २५ वर्षीय बिनोद राईले मंगलबार साँझ मदिरा सेवन गरी विवाद गर्ने क्रममा खुकुरी प्रहार गर्दा गम्भीर घाइते भएका पूर्ण बहादुरको बिएनसी अस्पताल झापामा बिहीबार बिहान उपचारको क्रममा मृत्यु भएको हो । खुकुरी प्रहार गरी फरार बिनोदको प्रहरीले खोजी गर्नुसा साथै यस सम्बन्धमा थप अनुसन्धान गरिरहेको छ ।

 काठको मुस्लो प्रहारबाट मृत्यु :

संखुवासभा, सिलिचोङ गाउँपालिका-१ टेङ्छुङ बस्ने ४० वर्षीय आईत बहादुर राईको धान कुट्ने काठको मुस्लो प्रहारबाट मृत्यु भएको  छ । सोही ठाउँ बस्ने ३० वर्षीय बिनोद भन्ने किशोर राईसँग पुरानो रिसिबिको कारण झगडा हुँदा किशोरले आईत बहादुरलाई धान कुट्ने काठको मुस्लोले प्रहार गरेकाले गम्भीर घाइते भएका उनको स्थानीय स्वास्थ्य चौकी सिसुवाखोला उपचारको क्रममा मृत्यु भएको हो । घटनाको खबर प्राप्त हुनासाथ जिल्ला प्रहरी कार्यालयबाट खटिएको प्रहरीले किशोरलाई पक्राउ गरी यस सम्बन्धमा थप अनुसन्धान गरिरहेको छ ।

हावाहुरीबाट धनमाल क्षति :

संखुवासभा, धर्मदेवी नगरपालिका-९ मुल गाउँमा रहेको भगवती माविको ढुंगामाटो बनेको र सोही नगरपालिका पुपाङस्थित रहेको माटोले बनेको ईन्द्रेणी युवा क्लबको भवनको छानो उडाई दुबै कार्यालयको भित्र रहेको सम्पूर्ण सामाग्री क्षति हुँदा करिब १२ लाख रुपैयाँ बराबरको धनमाल नष्ट भएको छ ।  यस सम्बन्धमा प्रहरीले आवश्यक उद्धार कार्य गरिरहेको छ ।

सवारी दुर्घटनामा मृत्यु   :

नवलपरासी (पूर्व), देवचुली नगरपालिका-२ हमालचोकस्थित पूर्वपश्चिम राजमार्गामा ना.२ ख ४८९० नम्बरको ट्रक र ना.४ ख ५२९५ नम्बरको बस एकआपसमा बिहीबार बिहान ठक्कर खाई दुर्घटना हुँदा घाइते भएका हाल नाम, थर, वतन नखुलेका २ महिलाको पुरानो मेडिकल कलेज भरतपुर चितवनमा उपचारको क्रममा मृत्यु भएको छ । दुर्घटनामा घाइते भएका अन्य २४ जना मध्ये १ जना पुरुषको सोही अस्पातालमा तथा १३ जनाको मनकामना पोलीकिल्निक अस्पताल चितवनमा, ८ जनाको नयाँ मेडिकल कलेज भरतपुर चितवनमा र २ जनाको प्राथमिक स्वास्थ्य केन्द्र दुम्कौलिमा उपचार भइरहेको छ । दुबै सवारी साधन तथा चालकलाई प्रहरीले नियन्त्रणमा लिएको छ ।

आगलागीबाट धनमाल नष्ट  :

काठमाडौं, बारा र महोत्तरीमा भएका छुट्टाछुट्टै आगलागीबाट करिब ११ लाख रुपैयाँ बराबरको धनमाल नष्ट भएको छ । बारा, जीतपुर सिमरा उपमहानगरपालिका-११ आमाटर बस्ने ५० वर्षीय धन सुन्दर बैठाले आफ्नो खेतमा आगो लगाउने क्रममा बिहीबार बिहान उक्त आगो छिमेकी नवराज उप्रेतीको उखु खेतमा समेत फैलिएर उखु जली करिब ४ लाख रुपैयाँ बराबरको क्षति भएको छ ।

महोत्तरी, महोत्तरी गाउँपालिका-३ डामीमडै बस्ने रामसोगारथ यादवको घरमा खाना बनाउने क्रममा बिहीबार बिहान आगलागी हुँदा छिमेकी बुधन नदाफ समेतको घरमा समेत आगलागी भई दुबै जनाको घर तथा घरभित्र रहेका सामान जलेर करिब ७ लाख रुपैयाँ बराबरको धनमाल नष्ट भएको छ । स्थानीयबासीको सहयोगमा आगो नियन्त्रणमा लिनुका साथै यस सम्बन्धमा प्रहरीले आवश्यक अनुसन्धान गरिरहेको छ ।