प्रधानमन्त्री ओली भारत गएपछि नेकपाको सचिवालय बैठक सर्‍यो !

काठमाडौं । नेपाल कम्युनिस्ट पार्टी ‘नेकपा’ को शनिबार ‘भोली’ बस्ने भनिएको सचिवालयको बैठक सरेको छ । लामो समयदेखि गठन हुन नसकेको पोलिटव्युरो र विभाग गठनका विषयमा गम्भीर छलफल गर्नुपर्ने भएकाले समय नपुगेका कारण छलफलका लागि सचिवालय बैठक २ दिन पछिलाई सरेको हो ।

भोली बस्ने भनिएको सचिवालय बैठकले पोलिटब्यूरो गठन गर्ने तथा विभागहरु गठन गर्ने कार्यसूचि थियो । तर, प्रधानमन्त्री ओलीले गृहकार्य गर्न नभ्याएको भनेपछि बैठक १८ गतेको साटो २० गतेलाई सारिएको स्रोतले बताएको छ ।

नेकपा स्रोतका अनुसार बिहीबार प्रधानमन्त्री केपी शर्मा ओली दिल्ली जानुअघि दुई अध्यक्षवीच संक्षिप्त कुराकानी भएको थियो । राष्ट्रपति कार्यालयमा पदक वितरण समारोहमा भाग लिएपछि प्रचण्डले प्रधानमन्त्री ओलीसँग संक्षिप्त कुराकानी गरेका थिए ।

सोही कुराकानीमा प्रधानमन्त्री ओलीले मोदीकाे सपथमा आफू भारत जानुपरेकाले गृहकार्य गर्न नभ्याइएको भन्दै सचिवालय बैठक २० गतेलाई सार्ने प्रस्ताव गरेको प्रधाभनमन्त्री निकट स्रोतले जानकारी दियो ।