आर्थिक वर्ष २०७६/७७ को बजेट कामचलाउ प्रकृति : नेपाली कांग्रेस

काठमाडौं । प्रमुख प्रतिपक्षी नेपाली कांग्रेसले सरकारद्वारा आर्थिक वर्ष २०७६/७७ का लागि तर्जुमा गरिएको बजेट कामचलाउ प्रकृतिको भएको टिप्पणी गरको छ ।

बजेटका बारेमा धारणा सार्वजनिक गर्न शुक्रबार पार्टी कार्यालय सानेपामा पत्रकार सम्मेलन गर्दे काग्रेसले नविन कार्यक्रम, दुरगामी लक्ष्य र जोखिम मोल्न सक्ने क्षमताको अभाव भएको कामचलाउ प्रकृतिको बजेट सरकारले ल्याएको टिप्पणी गरेको हो ।

वर्तमान सरकारको प्रथम बजेटले छाडेको अलमल, अलपत्र योजना र करिव सबै पुरानै अधुरा सपनाहरुको भारी दोस्रो वर्षको बजेटलाई बोकाइएको कांग्रेसको ठहर छ । त्यस्तै काग्रेसले समृद्धिका लागि आवश्यक सन्तुलनलाई गति दिने गरी विषय प्रवेश वर्तमान सरकारको दोस्रो बजेटमा पनि हुन नसको समेत जनाएको छ ।

विकास खर्चका लागि ३ खर्व विदेशी ऋणको प्रतिक्षा तथा २ खर्व स्वदेशी ऋणको जोहो गर्नुपर्ने स्थिति अत्यन्तै जोखिमपूर्ण रहेको काग्रेस प्रवक्ता बिश्वप्रकाश शर्माले बताए । उनले सैद्धान्तिक अन्र्तविरोधको प्रभावमा परेको स्थितिमा बजेट निर्मित भएको धारणा समेत राखे ।

पत्रकार सम्मेलनमा कांग्रेसका नेता एवं काग्रेस छाया सरकारका अर्थमन्त्री डाक्टर मिनेन्द्र रिजालले बजेट वितरणमुखी भएको बताए । विप्रेषणले नेपालको गरिबीको दर घट्न घट्न सहयोग गरिरहेको भन्दै डाक्टर रिजालले त्यही विप्रेषणले सृजना गरेको उपभोगमाथि ३७ प्रतिशत राजस्व लगाएर चालू खर्च गर्ने मनासय सरकारले राखेको आरोप लगाए ।

कांग्रेसले समग्र बजेटको आकार बढ्दा त्यो बढेको अनुपातमा प्रदेश र स्थानीय तहलाई रकम बढाउने संघीयता संवेदनशील मनोविज्ञान बजेटमा नदेखिएको पनि जनाएको छ ।

बजेटले संघीयतालाई सार्थक बनाउन अघिल्लो वर्षको कमजोरी पहिचान गरेर अघि बढ्ने संकेत नदिएको पनि कांग्रेसको ठहर छ ।