नेकपाको सचिवालय बैठक स्थगित, दुई अध्यक्षबीच गृहकार्यको खाँचो !

काठमाडौं । सत्तारुढ नेपाल कम्युनिष्ट पार्टी ‘नेकपा’को सचिवालय बैठक स्थगित भएको छ । पार्टी एकता र आन्तरिक विवाद समाधानका लागि भन्दै सोमबारका लागि बोलाइएको बैठक स्थगित भएको हो ।

पार्टीका दुई अध्यक्ष केपी शर्मा ओली र पुष्पकमल दाहाल प्रचण्डबीच थप गृहकार्यको खाँचो रहेकाले बैठक स्थगित भएको नेकपाका प्रवक्ता नारायणकाजी श्रेष्ठले बताएका छन् ।

नेकपा भित्र केही दिनयता शीर्ष दुई नेता ओली र प्रचण्डबीच नै एकमत नरहेको देखिएको थियो । टेलिभिजन अन्तर्वार्ताको क्रममा प्रचण्डले प्रधानमन्त्री पद आलोपालो गर्ने सहमति भएको बताएका थिए । त्यसको जवाफमा प्रधानमन्त्री समेत रहेका ओलीले पार्टी एकता खलबल्याउने प्रयास भनेका थिए ।

त्यसपछि समस्या समाधानको प्रयासमा आइतबार बिहान बालुवाटारमा ओली र प्रचण्डसहित अर्का नेता माधवकुमार नेपालबिच वार्ता भएको थियो । सोही वार्तापछि सोमबारका लागि सचिवालयको बैठक डाकिएको थियो ।

तर अझै दुई अध्यक्षले आफूहरुबीचमै गृहकार्यको खाँचो रहेको बताएपछि बैठक तत्कालका लागि पर सरेको प्रवक्ता श्रेष्ठले उल्लेख गरेका छन् ।