बुढीगण्डकी जलविद्युत आयोजना १२०० मेगावाटकै बनाउन निर्देशन

काठमाडौं । राष्ट्रियसभा अन्तर्गतको राष्ट्रिय सरोकार तथा समन्वय समितिले राष्ट्रिय गौरवको बुढीगण्डकी जलविद्युत आयोजना १२०० मेगावाट कै बनाउन सरकारलाई निर्देशन दिएको छ ।

सिंहदरबारमा सोमबार बसेको समिति बैठकले डिपिआर बमोजिम बुढीगण्डकी जलविद्युत आयोजना १२०० मेगावाट कै बनाउन उर्जा मन्त्रालयलाई निर्देशन दिएको हो ।

त्यस्तै बैठकले गोरखा र धादिङ जिल्लामा पर्ने आयोजना प्रभावित आरुघाट, आर्खेत र खहरे क्षेत्रको २४ सय रोपनी जग्गाको मुआब्जा तत्काल बितरण गरी निर्माण कार्य शुरु गर्न पनि निर्देशन दिएको छ ।

बैठकमा उर्जामन्त्री वर्षमान पुनले पनि बुढीगण्डकी आयोजना १२ सय मेगावाट कै बनाउने बताए । यसअघि उर्जामन्त्री पुनले बुढीगण्डकीलाई १२ बाट घटाएर ९ सय मेगावाटको बनाउने बताउँदै आएका थिए । मन्त्री पुनले मुआव्जाको बिषयलाई सम्बोधन गर्दै सरकार अघि बढेको धारणा राखे । आयोजनाको आर्थिक मोडालिटीका बारेमा पनि थप अध्ययन भइरहेको जानकारी दिए ।

बैठकमा समिति सदस्यहरुले कुनै पनि बहानामा उक्त आयोजनाको निर्माण कार्य नरोक्न सरकारको ध्यानाकर्षण गराए । यता, बुढीगण्डकी लगायतका ४ जलविद्युत् आयोजनालाई २५ अर्ब रुपैंयाभन्दा बढी बजेट विनियोजन गरिएको छ । उर्जा क्षेत्रमा आगामी वर्ष ८३ अर्ब ४९ करोड रुपैंया खर्च गर्ने लक्ष्य सरकारले लिएको छ ।