राजनीतिक दबाबका कारण न्यायिक समितिले काम गर्न सकेन

पर्सा । पटेर्वा सुगौली गाउँपालिकाका उपाध्यक्ष ममता महतो थारूको संयोजकत्वमा रहेको न्यायिक समितिले राजनीतिक दबाबका कारण काम गर्न नसकेको समाचार प्राप्त भएकोछ । पश्चिमी पर्साको दुर्गममा रहेको सो गाउँपालिकाको न्यायिक समितिमा हालसम्म ९५ विभिन्न मुद्दा रहेकामा हालसम्म ७० मुद्दा फछ्र्योट भएका छन् ।

अधिक सङ्ख्यामा मुद्दा फछ्र्योट भए पनि बाँकी रहेका मुद्दा राजनीतिक दबाबका कारण फछ्र्योट हुन नसकेका न्यायिक समितिका संयोजक महतोले बताइन् । प्रायः जग्गा किचलो, लेनदेन, महिला हिंसा, झैझगडा, सासू बुहारीबीचको झगडा, श्रीमान् श्रीमतीबीचको विवादजस्ता मुद्दा रहेका बताइएको छ । गाउँपालिकाका पाँचवटै वडामा वडास्तरीय मेलमिलाप केन्द्र गठन भएका र शुरुमा सो केन्द्रमा मुद्दा पठाउने गरिएको उनले जानकारी दिइन् ।

जटिल प्रकृतिका मुद्दामा सरकारी वकिलबाट सल्लाह लिएर त्यस्ता मुद्दा फैसला गरिने र सो मुद्दा फैसला हुन नसकेमा कानूनी उपचारका लागि अदालत पठाइने गरिएको छ । रुढीवादी परम्पराका कारण पुरुषले महिलाको नागरिकता नबनाइ दिने कारणले पनि महिलाले न्यायिक समितिबाट न्याय पाउन सकेका छैनन् ।