नेकपाको सचिवालय बैठक निष्कर्षविहिन, कार्यविभाजनको टुंगो लगाउन बिहीबार बैठक बस्ने !

काठमाडौ । सत्तारुढ नेपाल कम्युनिष्ट पार्टी ‘नेकपा’ जिल्ला तहका इन्चार्ज र सहइन्चार्ज टुंगो लगाउन बुधबार पनि असफल भएको छ। मध्यान्ह १२ बजेदेखि करिव २ घण्टा चलेको सचिवालय बैठकले सकेसम्म मन्त्री र सासदलाई जिल्लाको जिम्मेवारी नदिनेमा सहमति जनाए पनि नाम टुंगो लगाउन असफल भएको हो।

मापदण्डका बिषयमा वरिष्ठ नेता माधवकुमार नेपाल पक्षले दोहोरो जिम्मेवारी दिन नहुने अडान राख्दै आएको छ भने अध्यक्ष केपी शर्मा ओली पक्षले प्रदेश इञ्चार्जहरु तोक्दा नै त्यो खण्डित भएको तर्क गर्दै आएका छन् ।

यस बिषयमा पार्टीका अर्का अध्यक्ष पुष्प कमल दाहालले भने मध्यमार्गी बाटो अपनाउने बताउदै आउनुभएको छ । बैठकपछि नेकपा प्रवक्ता नारायणकाजी श्रेष्ठले बैठक बिहिबार बिहान ९ बजे बस्ने र इञ्चार्ज तथा सहइञ्चार्जका बारेमा टुङ्गो लगाइने बताए । इञ्चार्ज र सहइञ्चार्जका बारेमा छलफल भएपनि नेताहरुबीच कुनै विवाद नभएको उनको भनाई छ ।

नेकपाले इञ्चार्ज र सहइञ्चार्जका बारेमा टुङ्गो लगाएपछि अन्य एकताका बारेमा छलफल गर्ने तयारी गरेको छ । नाम टुंगो लगाउन बिहीबार विहान ९ बजेट फेरि बालुवाटारमा नेकपाको सचिवालय बैठक बस्‍ने भएको छ ।

बुधबार पार्टी अध्यक्ष एवम् प्रधानमन्त्री केपी शर्मा ओलीको कार्यव्यवस्ताले बैठक लम्बिन नसकेको प्रवक्ता नारायणकाजी श्रेष्ठले जानकारी दिए। भोलिको बैठकमा नाम टुंगो लाग्ने आजको बैठकको निष्र्कष छ ।