काठमाडौं । संसदमा प्रमुख प्रतिपक्षी नेपाली कांग्रेसका सांसदको अवरोधका कारण बोल्न नपाएका प्रधानमन्त्री केपी शर्मा ओलीले दुःख व्यक्त गरेका छन् ।

यसै विषयमा प्रधानमन्त्री ओलीले बेलुका पाँच बजे सिंहदरबारमा पत्रकार सम्मेलन गरी आफ्नो भनाई सार्वजनिक गर्ने निजी स्रोतले जनाएको छ ।

संसदमा को पहिला बोल्ने भन्ने विषयमा विवाद हुँदा कांग्रेसका सांसदले रोस्टम घेराउ गरेपछि संसद बैठक स्थगित गर्न सभामुख कृष्णबहादुर महरा बाध्य भए । बोल्नका लागि रोस्टममा पुगेका प्रधानमन्त्री ओलीले बोल्न पाएनन् ।

प्रतिपक्षी नेकॉले
रोष्ट्रम घेरी अबरोध गरेका कारण
मैले हालैको युरोप भ्रमण र
गुठी बिधेयक लगायतका समसायिक बिषयहरूमा
रहेको जनचासोका सन्दर्भमा
सम्मानीत सदनलाई आज जानकारी गराउन पाईन।
यस घटनाबाट म दु:खी भएको छु।

— K P Sharma Oli (@kpsharmaoli) June 18, 2019

संसद भवनबाट बाहिरिने क्रममा संक्षिप्त प्रतिक्रिया दिँदै प्रधानमन्त्री ओलीले बेलुका सबै कुरा थाहा हुने बताए । उनले भने, ‘बेलुका पाँच बजे पत्रकार सम्मेलन हुन्छ, सबै कुरा त्यहिँ बताउँला ।’

प्रधानमन्त्री केपी शर्मा ओली या प्रतिपक्षी दलका नेता शेरबहादुर देउवाले पहिले संसदमा बोल्ने भन्ने विषयमा विवाद भइरहेका बेला सभामुखले बैठक सुरु गरेर प्रधानमन्त्री ओलीलाई बोल्न समय दिएका थिए ।

त्यसपछि कांग्रेस सांसदले रोस्टम घेरेका थिए । सभामुखले बैठक बुधबार बिहान ११ बजेसम्मका लागि स्थगित गरे । संसदमा भएको यो घटनाप्रति मिश्रित प्रतिक्रिया आएको छ ।

यो पनि पढ्नुस : 

प्रतिनिधिसभा बैठक : ओली र देउवामा कसले पहिले बोल्ने बारे विवाद !

कांग्रेसका सांसदले रोस्टम घेराउ गरेपछि प्रधानमन्त्री ओली चुपचाप !