संसदलाई छलेर बिधेयक फिर्ता लिनु नियमसंगत छैन : कांग्रेस सभापति देउवा

काठमाडौं । प्रमुख प्रतिपक्षी दल नेपाली कांग्रेसका नेता एवम् पूर्वप्रधानमन्त्री शेरबहादुर देउवाले प्रमुख प्रतिपक्षी दलका नेताको हैसियतले मंगलबार सदनको बैठकमा आफूले बोल्न नपाएकोमा आपत्ति जनाएका छन् ।

प्रतिनिधिसभाको बुधबारको बैठकमा सभामुख कृष्णबहादुर महरासँग समय मागेर सभापति देउवाले सदनमा अभिव्यक्ति राख्नका लागि समय लिइसक्दा पनि बोल्न नदिएको भन्दै आपत्ती जनाए ।

उनले संसदमा पेश भएको बिधेयक संसदलाई छलेर फिर्ता लिनु नियम संगत नभएको जिकिर गरे । उनले मिडिया काउन्सिलसम्बन्धी विधेयक प्रजातन्त्र र लोकतन्त्रविरोधी रहेको उल्लेख गर्दै यसले संविधान प्रदत्त वाक् तथा अभिव्यक्ति स्वतन्त्रता हनन् गर्ने बताए ।

देउवाले स्वतन्त्र र निष्पक्ष हुने मानवअधिकार आयोगलाई कमजोर पार्न विधेयक आएकाेमा आपत्ति जनाउँदै मानवअधिकार बिनाको प्रजातन्त्र कसरी सुदृढ हुन्छ ? भन्ने प्रश्न गरे । प्रधानमन्त्री ओलीको हालै भएको ९ दिने युरोप भ्रमण असफल भएको उनले टिप्पणी गरे ।