रसुवागढी जलविद्युत आयोजनाको सुरुङ भत्किएर थुनिएका १७ मजदुरको सकुशल उद्धार

रसुवा । निर्माणाधिन रसुवागढी जलविद्युत् आयोजनाको सुरुङमा पहिरो जाँदा थुनिएका १७ मजदुरको सकुशल उद्धार भएको छ ।

तीन नम्बर सुरुङको प्रवेश मार्गमा बिहीबार राती साँढे ८ बजे सुख्खा पहिरो गएपछि मजदुर थुनिएका थिए । उनीहरु सुरुङको १०० मिटर भित्र थुनिएका थिए ।

सुरुङभित्र ११ नेपाली र ६ चिनियाँ मजदुरले काम गरिरहँदा माथिबाट चट्टानसहितको पहिरो झरेर सुरुङमार्ग थुनिएको थियो । उनीहरुलाई राति साढे १० बजेतिर अर्को सुरुङबाट गएर सकुशल उद्धार गरिएको जिल्ला प्रहरी कार्यालय रसुवाले जनाएको छ ।

प्रहरीले तीन नम्बर सुरुङ बाहेक अन्यत्र काम भैरहेको जनाएको छ । नेपाल–चीन सीमा क्षेत्र रसुवागढी नजिकै एक सय ११ मेगावाटका जलविद्युत् आयोजना निर्माण भइरहेको छ ।