मानवअधिकार रक्षाका लागी सञ्चारमाध्यमको भूमिका महत्वपूर्ण !

काठमाडौं । राष्ट्रिय मानवअधिकार आयोगका अध्यक्ष अनुपराज शर्माले मानवअधिकार रक्षाका लागी सञ्चारमाध्यमको भूमिका महत्वपूर्ण हुने बताएका छन् ।

राष्ट्रिय मानवअधिकार आयोगद्वारा सोमबार काठमाडौँमा आयोजित मानवअधिकारको समसामयिक विषयमा सञ्चारकर्मीहरुसँग छलफल कार्यक्रममा उनले दण्डहिनतालाई रोक्नका लागी दवाव दिन सञ्चारमाध्यमको भूमिका महत्वपूर्ण हुने बताएका हुन् ।

त्यस्तै उनले मानवअधिकार हननका धेरै घटनाका बारेमा आयोगले अध्ययन गरेर प्रतिवेदन सरकारलाई बुझाएपनि कार्यान्वयनका अवस्था भने सन्तोषजनक नरहेको बताए । एकपछि अर्को गरी विवादित विधेयकहरु ल्याइनु, प्रहरी ‘इन्काउन्टर’माथि प्रश्न उठ्नु, दन्डहीनता झन् बढ्नुले सरकार संविधानको मर्मअनुरुप चल्नुपर्ने देखिएको उनले बताए ।

कार्यक्रममा नेपाल पत्रकार महासंघका पूर्व अध्यक्ष डाक्टर महेन्द्र बिष्टले आयोगले मानवअधिकारसम्बन्धी गरेको अध्ययन सुझावको सरकारले कार्यान्वयन गर्नुपर्ने धारणा राखे । पत्रकार महासंघका महासचिव रमेश बिष्टले सरकार परिवर्तन भएपनि मानवअधिकार रक्षाको सवाल जस्ताको त्यस्तै रहेको बताए ।

यस्तै, आयोगका पूर्वआयुक्त गोकुल पोखरेलले नेताहरुले जनतालाई सपना बाँड्ने तर त्यसअनुरुप कार्य नगर्ने गर्दा जनतामा निराशा बढेको र नेतृत्व आलोचनाका पात्र बन्ने गरेको धारणा राखे ।