आज नेत्रविक्रम चन्द विप्लवको नेपाल बन्द, काठमाडौं उपत्यकामा कम प्रभाव

काठमाडौं । प्रहरीको गोली लागेर सर्लाहीका आफ्ना जिल्ला इन्चार्ज कुमार पौडेलको ज्यान गएको विरोधमा नेत्रविक्रम चन्द ‘विप्लव’ नेतृत्वको नेकपाले आह्वान गरेको बन्दको प्रभाव काठमाडौँ उपत्यकामा कम परेको छ ।

अरु दिनको तुलनामा सार्वजनिक गाडी कम चलेका छन् । तर प्रभाव कम देखिएको छ । सार्वजनिक गाडीहरु थोरै भए पनि चलेका छन् । निजी सवारी साधन भने निर्वाध रुपमा चलेका छन् ।

गएको बिहीबार दिउँसो प्रहरीको गोली लागेर सर्लाहीको लालबन्दी–१ लखनदेहीस्थित जंगलको पश्चिम तर्फ रहेको उत्तर–दक्षिण बाटोमा पौडेलेको मृत्यु भएको थियो । घटनाबाट आक्रोशित भएको विप्लव नेतृत्वको नेकपाले मंगलबारका लागि बन्द आह्वान गरेको हो । उसले प्रहरीले इन्काउन्टर गरेर मारेको आरोप लगाएको छ ।

तर सरकारले भने दोहोरो झडपमा पौडेलको ज्यान गएको बताएको छ । राज्यव्यवस्था समितिको बैठकमा गृहमन्त्री रामबहादुर थापा बादलले प्रहरीले आत्मरक्षाका लागि गोली चलाउँदा पौडेलको मृत्यु भएको दाबी गरेका छन् । तर सत्तारुढ दलकै सांसदमा विवाद रहेको छ ।

बन्दलाई लिएर सरकारले सुरक्षाव्यवस्था कडा बनाएको छ । यसैबिच ललितपुरको जावलाखेलमा मंगलबार बिहान कालो झोलामा संकास्पद बस्तु भेटिएको छ । त्यसबारे अनुसन्धान भइरहेको प्रहरीले जनाएको छ ।