कीर्तिपुरमा शंकास्पद वस्तु फेला, सेनाले डिस्पोज गर्दा प्लाष्टिकको भाँडोभित्र माटो !

काठमाडौं । नेत्र विक्रम चन्द ‘विप्लव’ नेतृत्वको नेकपाले आह्वान गरेको नेपाल बन्दको बिहानैदेखि मंगलबार केही स्थानमा नक्कली र सक्कली बमको सन्त्रास फैलिएको छ ।

बिहान किर्तिपुरको नयाँबजारस्थित सडक छेउमा शंकास्पद वस्तु फेला परेको छ । बन्दलाई सफल पार्न विप्लब नेतृत्वको नेकपाले बम राखेको हुन सक्ने अनुमान गरिएको थियो । बम रहेको हल्लालगत्तै नेपाल प्रहरीको टोलीले घेरा हालेको सुरक्षा दिएको थियो ।

सेनाको बम विस्पोजल टोली घटनास्थलतर्फ गई डिस्पोज गरिएको छ । तर उक्त बस्तु बम नभई तर्साउन राखिएको नक्कली बम रहेछ । शंकास्पद वस्तु डिस्पोज गर्दा अनुसार प्लाष्टिकको भाँडोभित्र माटो र तारमात्र राखिएको भेटिएको हो ।

आज मंगलबार बिहानै बनेपास्थित रातो पुल नजिक बम विस्फोट भएको बताइएको छ । बिहान करिब ३ बजेतिर विस्फोटको ठूलो आवाज आएको स्थानीयले बताएका छन् । प्रहरीले भने विस्फोटको पुष्टि गरेको छैन ।

उता पनौती- ७ स्थित ढुंखर्क बसस्टपमा र खोपासी मार्गको रोशी खोला पुलमा राखेको २ वटा प्रेसर कुकर बम भेटिएको छ । उक्त स्थानमा राखिएको बम नेपाली सेनाको धुलिखेलस्थित विष्णुदल गणबाट खटिएको टोलीले डिस्पोज गरिसकेको जनाइएको छ ।

बन्दका कारणका मुख्य शहर बजारमा पनि बिहानैदेखि आशिंक रुपमा सवारी साधन चलेका छन् । सुरक्षाका लागि हतियारसहितका प्रहरी परिचालन गरिएको छ ।