४१ लाख नगदसहित ८ जना हुण्डी कारोबारी पक्राउ

वीरगञ्ज । विरगञ्जमा ४१ लाख नगदसहित ८ जना हुण्डी कारोबारी पक्राउ परेछन् । पक्राउ पर्नेमा दुई जना भारतीय नागरिक समेत छन् ।

प्रहरीले वीरगञ्ज महानगरपालिका- १० का चन्दन कुमार सर्राफ, ६ का राकेश कुमार सिंह, पर्साको छिपहरमाई गाउँपालिका वडा नम्बर २ का राजकपुर साह, विन्दवासिनी गाउँपालिका–२ का सुजित कुमार साह, रौतहट चन्द्रपुर नगरपालिका वडा नम्बर ७ का बिनोद सुनार, बारा परवानीपर गाउँपालिका–१ का घनश्याम सर्राफ, भारत विहार मोतिहारी जिल्ला पुर्वी चम्पारण बस्ने सुनिल कुमार प्रसाद र विहार मोतिहार जिल्ला नैनपुर बस्ने गुलाब साहलाई पक्राउ गरेको हो ।

वीरगञ्ज महानगरपालिका–६ माइस्थान चोकमा कन्हैया प्रसाद सोनारले सञ्चालन गरेको सुनचाँदी पसल के.पी.स्वर्णकला केन्द्रसँगै टासिएको कोठाबाट उनीहरु पक्राउ परेका हुन् ।

बरामद भएको रकमसहित पक्राउ परेका सबैलाई प्रहरी हिरासतमा राखी अनुसन्धान प्रक्रिया अघि बढाइएको जिल्ला प्रहरी कार्यालय पर्साले जनाएको छ । प्रहरीले सुन पसलमा थप अनुसन्धानको लागी सिलबन्दी गरेको छ ।