ललितपुर महानगरले ल्यायाे ५ अर्ब १७ करोडकाे बजेट कार्यक्रम

ललितपुर । ललितपुर महानगरपालिकाले ५ अर्ब १७ करोड ९६ लाख ३२ हजारको बजेट प्रस्तुत गरेको छ ।

महानगरपालिका मेयर चिरिबावु महर्जनले मंगलबार महानगरको नगरसभामा आगामी आर्थिक वर्ष २०७६/७७ को लागि सो बजेट प्रस्तुत गरेका हुन् ।

महानगरले पूर्वाधार विकासमा प्राथमिकता दिएर कूल बजेटको ३९ प्रतिशत रकम विकास बजेटको रुपमा विनियोजन गरेको छ । पूर्वाधार विकासमा मात्रै २ अर्ब ७ करोड ३६ लाख ३ हजार बजेट विनियोजन भएको छ ।

महर्जनले आगामी आर्थिक वर्षका लागि बजेट प्रस्तुत गर्दै चालु खर्चका लागि कुल बजेटको २१.७४ प्रतिशत अर्थात १ अर्ब १२ करोड ५९ लाख रुपैयाँ विनियोजन गरिएको बताए ।

यसैगरी आर्थिक विकासका लागि ७५ करोड ३४ लाख रुपैयाँ विनियोजन गरिएको छ भने भने संस्थागत विकास र सुशासनका लागि २ करोड २५ लाख बजेट छुट्टाएको छ ।

ललितपुर महानगरले सामाजिक विकासका लागि १६ करोड ८४ लाख रुपैयाँ, वातावरण तथा विपद् व्यवस्थापनमा लागि १६ करोड ५५ लाख रुपैयाँ बजेट बिनियोजन गरेको मेयर महर्जनले जानकारी दिए । नगरसभाको बन्द शत्रमा छलफल पछि बजेट पारित हुने महानगरले जनाएको छ ।