महानगरकै मूल्यांकनमा काठमाडौंभित्रका महँगा जग्गा, आनाको ५० लाख रुपैयाँ पर्ने जग्गाहरु

काठमाडौं। काठमाडौं महानगरपालिकाले आर्थिक विधेयक २०७६ ल्याउँदै आफ्नो अधिकार क्षेत्रभित्रको जग्गाको नयाँ मूल्यांकन तोकेको छ।

नयाँ मुल्य अनुसार मूल सडक आसपासको जग्गाको मूल्यांकन प्रति आना ५० लाख रुपैयाँ तोकेको छ।महानगरभित्र बाटो नभएका स्थानको न्यूनतम मूल्य चार लाख रुपैयाँ छ। केशरमहल प्रवेशद्धारदेखि पश्चिम ठमेल मूल चोक हुँदै क्षेत्रपाटीसम्मको जग्गा,हनुमानढोका,जिल्ला प्रहरी कार्यालय पूर्व,सुरज आर्केड इन्द्रचोक असन हुँदै भोटाहिटी चोकसम्म,असनचोकदेखि जमल राष्ट्रिय नाचघरसम्म तथा सोदेखि पूर्व विश्वज्योती हल हुँदै तीनधारा पाठशालासम्म मूलबाटासम्म,महेन्द्र शालिकदेखि काठमाडौं प्लाजासम्म जोडिएका दायाँबायाँका जग्गाहरुको प्रतिआना ५० लाख रुपैयाँ तोकिएको छ ।

माइतीघर सिंहदरबार पश्चिमगेट,पुतली सडक,कृष्ण पाउरोटी,हात्तीसार,जय नेपाल, कान्तिपथ, जमल,दरबारमार्ग र घण्टाघरदेखि कमलादी मोडसम्मका मूल सडकसँग जोडिएका दायाँबायाँका जग्गाको मूल्यांकन पचास लाख रुपैयाँ तोकिएको छ। त्यस्तै जमल,रानीपोखरी,वीर अस्पताल,नेपाल वायुसेवा निगम गोश्वारा हुलाक,त्रिपुरेश्वरसम्मको मूल सडकसंग जोडिएका दायाँबायाँका जग्गा र रत्नपार्क,पुरानो बसपार्क,शहिदगेट हुँदै सुन्धारा चोकसम्मको जग्गाको पनि मूल्याकंन ५० लाख रुपैयाँनै तोकिएको छ।