खराब मौसमका कारण मन्त्री अधिकारी चढेको हेलिकप्टर दुर्घटना : जाँचबुझ आयोग

काठमाडौं । तत्कालीन पर्यटनमन्त्री रवीन्द्र अधिकारीसहित ७ जना सवार हेलिकप्टर दुर्घटनाको मुख्य कारण ‘खराब मौसम’ रहेको निष्कर्ष जाँचबुझ आयोगले निकालेको छ ।

आयोगका संयोजक यज्ञप्रसाद गौतमले बुधबार संस्कृति पर्यटन तथा नागरिक उड्डयन राज्यमन्त्री धनबहादुर बुढालाई बुझाएको प्रारम्भिक प्रतिवेदनले उक्त हेलिकप्टर दुर्घटनाको मुख्य कारण एकाएक बिग्रिएको मौसम नै भएको उल्लेख गरेको छ । गत फागुन १५ गते पर्यटनमन्त्री अधिकारीसहित ७ जना सवार हेलिकप्टर ताप्लेजुङ्गको पाथीभरा क्षेत्रमा पर्ने सिस्नेभीरमा दुर्घटनामा परेको थियो ।

दुर्घटनामा नागरिक उड्डयन प्राधिकरणका उपामहानिर्देशक विरेन्द्रप्रसाद श्रेष्ठ, निर्देशक धुव्रदास भोछिभया, प्रधानमन्त्री कार्यालयका उपसपचिव युवराज दाहाल, यति एयरलाइन्सका प्रवन्ध निर्देशक आङछिरिङ्ग शेर्पा, पर्यटन मन्त्रीका अंगरक्षक नेपाली सेनाका जमदार अर्जुन घिमिरे र हेलिकप्टर पाइलट प्रभाकर केसीको निधन भएको थियो ।

जाँचबुझ आयोगका संयोजक गौतमले उक्त घटनाको अनुसन्धान घटनास्थलको भीडियो, तस्बिर विश्लेषण गर्दै स्थानीय प्रहरी, घासी, दाउरे, मन्दिरका जोगी, पुजारीसँग अन्तर्क्रियाका आधारमा यस्तो निर्ष्कषमा पुगेको बताए । जाँचबुझ समितिले गरेको अध्ययन अनुसार हेलिकप्टर दुर्घटना हुनुको मुख्य कारण खराब मौसम नै रहेको देखिएको छ ।