भद्रकाली मन्दिर परिसरमा युवतीलाई यातना दिने धर्तीमाता पक्राउ

काठमाडौं । काठमाडौंकाे भद्रकाली मन्दिरमा केही दिनअघि एक जना युवतीलाई यातना दिने आफूलाई ‘धर्तीमाता’का रुपमा चिनाउने विष्णु कुँवर पक्राउ परेकी छन् ।

महानगरीय प्रहरी परिसर काठमाडौंको टोलीले उनलाई शुक्रबार बिहान बालाजुबाट पक्राउ गरेको परिसरका प्रवक्ता होबिन्द्र बोगटीले जानकारी दिए ।

उनलाई अहिले महानगरीय प्रहरी परिसर टेकुको हिरासतमा राखिएको छ । बुटवलबाट काठमाडौं आएकी कुँवरले भद्रकाली मन्दिरमा दर्शन गर्न गएकी एक युवतीमाथि बोक्सी भगाउने नाममा कुटपिट गरेकी थिइन् ।

उक्त भिडियो अहिले सामाजिक सञ्जालभरी भाइरल बन्दै गएको छ । भिडियोमा उनले ‘तँ को होस्, छिटो निस्की’ भनेर युवतीको टाउकोमा हातले पिटेको देखिन्छ ।

कुँवरले ती युवतीमाथि जाइलाग्दै ‘निस्किन्छेस् कि निस्किन्नस्, तेरो मासु खाम्ला, मलाई चिन्’ लगायत शब्द प्रयोग गरेर गालीगलौज र हातपात गरेको समेत उक्त भिडियोमा देख्न सकिन्छ । भिडियोमा दुई प्रहरी अधिकृत पनि देखिएका छन्, तर तिनीहरुले घटनालाई हेरीरहेका छन् ।

घटनालाई लिएर सर्वसाधारणले प्रहरी प्रशासनको आलोचना गरेपछि अनुसन्धान सुरु भएको थियो ।प्रहरीले हालसम्म पीडितलाई भने भेटेको छैन ।

हेर्नुस यस्तो गरेकी थिइन धर्तीमाता