सडक दुर्घटना न्यूनीकरण गर्न सबैको सहयोग जरुरी : आइजीपी खनाल

काठमाडौं । प्रहरी महानिरीक्षक सर्वेन्द्र खनालले ट्राफिक व्यवस्थापन सबै नागरिकलाई भएको बताएका छन् । महानिरीक्षक खनालले काठमाडौं ट्राफिक व्यवस्थापन ट्राफिक प्रहरीको लागि नभइ सबै नागरिकका लागि भएकाले त्यसमा सबैको सहयोगको आवश्यकता रहेको पनि बताएका हुन् ।

शुक्रबार महानगरीय ट्राफिक प्रहरी महाशाखाले काठमाडौंमा आयोजना गरेको कार्यक्रममा बोल्दै उनले सडक दुर्घटना न्यूनीकरणका लागि पनि सबैको सहयोगको जरुरी रहेको बताए ।

त्यस्तै प्रहरी महानिरीक्षक खनालले समय निकालेर यात्रामा निस्कन पनि सवारी चालकहरुलाई आग्रह गरे । समयमा ननिस्कने अनि गन्तव्यमा ढिला पुगे ट्राफिक जामलाई दोष दिने प्रवृत्तिको पनि अन्त्य हुनुपर्ने महानिरीक्षक खनालको भनाइ छ ।

प्रहरी महानिरीक्षक खनालले काठमाडौंलाई सुन्दर शहरको रुपमा परिचित गराउन पनि ट्राफिक व्यवस्थापनको कामलाई प्रभावकारी बनाउनुपर्नेमा जोड दिए ।

उनले काठमाडौंको ट्राफिक व्यवस्थापनका लागि सामुदायसँगको साझेदारी कार्यक्रमलाई अझै प्रभावकारी बनाउँदै लैजाने प्रतिबद्धता पनि व्यक्त गरे ।