नक्कली सुन देखाई ठगी गर्ने व्यक्तिहरु पक्राउ

काठमाडौं । नक्कली सुन देखाई ठगी गर्ने कार्यमा संलग्न रहेको अभियोगमा प्रहरीले ५ जनालाई SUISSE 1 KILO FINEGOLD 999.9 C253774 लेखिएको विस्कुट आकारको नक्कली सुन १ थान सहित सोमबार पक्राउ गरेको छ ।

पक्राउ पर्नेहरुमा ललितपुर नख्खु बस्ने चितवन भरतपुर महानगरपालिका-८ की ३९ वर्षीया टिनु घिमिरे पन्त, काठमाडौं महानगरपालिका-३० ठेगाना भएकी ३४ वर्षीया सस्मिता आचार्य, काठमाडौं बौद्ध बस्ने सिन्धुपाल्चोक बालचोक गाउँपालिकाका-१ घर भएका २२ वर्षीय उमेश सुनार, भक्तपुर कौशलटार बस्ने सुनसरी ईनरुवा नगरपालिका-७ घर भएका ३४ वर्षीय जीवन धामी चौधरी र काठमाडौं गोगंबु बस्ने गोरखा चमनुब्री गाउँपालिका-६ घर भएकी ६५ वर्षीया जाम्मु लामा रहेका छन् ।

केही व्यक्तिहरु अबैध सुनको कारोवार गर्दैछन् भन्ने विशेष सूचनाको आधारमा महानगरीय अपराध महाशाखा टेकुबाट खटिएको प्रहरीले खोजी गर्ने क्रममा काठमाडौं महानगरपालिका-१६ बौद्ध पिपलबोटस्थित एमएस ज्वेयलर्समा राखिरहेको अवस्थामा उक्त नक्कली सुन फेला पारी उनीहरुलाई पक्राउ गरेको हो ।

यस सम्बन्धमा प्रहरीले थप अनुसन्धान गरिरहेको बताएको छ ।