शोधनान्तर घाटामा करिब दुई हजार प्रतिशतको बृद्धि

काठमाडौं । मुलुकको आर्थिक स्वास्थ्यको मापनका रुपमा रहेको मुलुकको आर्थिक अवस्था दिनानुदिन नाजुक हुँदै गएको तथ्यांक नेपाल राष्ट्र बैंकले हालै प्रकाशित गरेको एघार महिनाको प्रतिवेदनमा उल्लेख छ ।

आर्थिक वर्ष २०७५/७६ को प्रथम एघार महिनाको अवधिमा मुलुकको चालु खाता घाटा विस्तार भई रु.२४८ अर्ब ७२ करोड पुगेको छ । अघिल्लो वर्षको सोही अवधिमा यस्तो घाटा रु.२१० अर्ब २४ करोड रहेको थियो । अमेरिकी डलरमा अघिल्लो वर्षको एघार महिनामा २ अर्ब ३ करोड रहेको चालु खाता घाटा समीक्षा अवधिमा २ अर्ब २० करोड पुगेको छ ।

समीक्षा अवधिमा शोधनान्तर स्थिति रु.९० अर्ब ८३ करोडले घाटामा रहेको छ । अघिल्लो वर्षको सोही अवधिमा शोधनान्तर स्थिति रु.४ अर्ब ३४ करोडले घाटामा रहेको थियो । यसरी नेपाली मूद्रामा चालुखाता घाटामा करिब १८ प्रतिशतले वृद्धि भएको छ भने शोधनान्तर घाटामा करिब १९९३ प्रतिशतको भारी वृद्धि देखिएको छ ।

अमेरिकी डलरमा शोधनान्तर स्थिति अघिल्लो वर्षको एघार महिनामा ४ करोड ९९ लाखले घाटामा रहेकोमा समीक्षा अवधिमा ८० करोड ३१ लाखले घाटामा रहेको छ ।

समीक्षा अवधिमा पुँजीगत ट्रान्सफर रु.१३ अर्ब ८८ करोड र प्रत्यक्ष वैदेशिक लगानी रु.११ अर्ब ८१ करोड रहेको छ । अघिल्लो वर्षको सोही अवधिमा पुँजीगत ट्रान्सफर रु.१५ अर्ब २ करोड र प्रत्यक्ष वैदेशिक लगानी रु.१५ अर्ब ८८ करोड रहेको थियो ।