अज्ञात समूहद्वारा एनसेल टावरमा आगजनी र विष्फोट

काठमाडौं । अज्ञात समूहले देशभर एक दर्जन बढी जिल्लाका एनसेल टावरमा आगजनी तथा विष्फोट गराएको छ । आगजनी र विस्फोटका कारण कतिपय जिल्लामा सञ्चार सम्पर्क विच्छेद भएपछि सेवाग्राही मर्कामा परेका छन् ।

ललितपुर, सिन्धुपाल्चोक, धादिङ, झापा, पूर्वी नवलपरासी, पर्वत, बाग्लुङ, म्याग्दी, कपिलवस्तु, डडेलधुरा, कैलाली, रुपन्देही जिल्लाका एनसेल टावरमा आगजनी र विष्फोट भएको तथा मोरङको उर्लाबारीमा रहेको एनसेल टावरमा आगजनी भएको प्रहरीले जानकारी दिएको छ ।

यता अर्घाखाँचीमा भने नेपाल टेलिकमको टावरमा आगजनी भएको छ । जिल्लाको पाणिनी गाउँपालिका वडा नम्बर ५ मैदानको अमजामा रहेको नेपाल टेलिकमको टावरमा आगजनी भएको हो । गएराति करिब ८ बजे आगजनी भएको र सामान्य क्षति पुगेको प्रहरीले जनाएको छ ।

विष्फोट र आगजनी कसले गरायो भनेर एकीन भएको छैन, तर विप्लव समूहको संलग्नता रहेको अनुमान गरीएको छ । विप्लव समूहले एनसेल र एनटीसीका टावरमा क्षति पुर्‍याउँदै आएको छ ।