पारिश्रमिक नपाएर विस्थापित हुनु हुँदैन : पराजुली

काठमाडौं । न्यूनतम पारिश्रमिक निर्धारण समितिका अध्यक्ष गङ्गाधर पराजुलीले पारिश्रमिक नपाएर पत्रकार विस्थापित हुने अवस्था आउन नहुने बताएका छन्।

समितिको आयोजना र नेपाल पत्रकार महासङ्घ तनहँु शाखाको संयोजनमा आज आयोजित श्रमजीवी पत्रकार ऐनको कार्यान्वयन तथा श्रमजीवी पत्रकार र मिडिया सञ्चालकका समस्या विषयक अन्तक्र्ीयामा अध्यक्ष पराजुलीले समितिको सिफारिस बमोजिम सरकारले २०७५ कात्तिकदेखि लागू हुनेगरी पत्रकारको न्यूनतम पारिश्रमिक निर्धारण गरिसकेका चर्चा गरे । “काममा लगाइसकेपछि न्यूनतम पारिश्रमिक दिन्न भन्न पाइँदैन,” उनले भने ।

केही समय अगाडि नेपालका ठूला मिडिया न्यूनतम पारिश्रमिक विरुद्ध लागे पनि साउनदेखि न्यूनतम पारिश्रमिकको मुद्दा कसैले बोक्न नपर्ने गरी कार्यान्वयन गर्ने प्रतिबद्धता जनाएको पराजुलीले जानकारी दिए । तीन वर्षदेखि बढ्न नसकेको न्यूनतम पारिश्रमिक कात्तिक १ गतेदेखि २५ प्रतिशतले वृद्धि भएकोले यसको कार्यान्वयनका लागि सबै पक्ष गम्भीर हुनुपर्नेमा उनको भनाइ थियो ।