क्याम्पसमा रेणु पक्षधर र धर्मदेव पक्षधरबीच कुटाकुट, प्रहरीले हेर्यो रमिता

२८ साउन, राजविराज । महेन्द्र विन्देश्वरी बहुमुखी क्याम्पसको ६३ औं क्याम्पस दिवस बिथोलिएको छ । मंगलबार कार्यक्रम बिथोलिएपछि दाता परिवार इन्द्रदेव यादवका बुहारी एवं समाजवादी पार्टीका उपाध्यक्ष तथा पूर्व शिक्षामन्त्री रेणुकुमारी यादव रितै फर्किएकी छिन । दाता परिवारको अर्को पक्षले सभालहमै तालबन्दी गरेपछि विवाद उत्पन्न हुँदा उनीसहितकाे टोली रित्तै फर्किनु परेको हो ।

वि.सं. २०१४ सालमा एक विघा १७ कठ्ठा छ धुर जग्गा र नगद रु. एक लाख दान गरेका सप्तरीको खडकपुर निवासी स्व. विन्देश्वरीप्रसाद यादवका दुई छोरामध्ये (इन्द्रदेव यादव र धर्मदेव यादव) धर्मदेव यादवका छोरा, बुहारी, नातिनीले क्याम्पस दिवसको अवसरमा सजाएको सभाहलमा कार्यक्रम अगाडी नै तालाबन्दी गरेका थिए ।

विरोधी समुहले क्याम्पसको स्थापना दिवसमा आफुहरुलाई निम्तो पनि नदिएको र कुनै वास्ता पनि नगरेको हुनाले सभाहलमा तालाबन्दी गरेको बताए । सभाहलको ताल फुटाएर जबर्रजस्ती कार्यक्रम सञ्चालन गर्न खोज्दा विद्यार्थी र ती परिवारबीच झडप हुँदा दाता परिवारका दुई जना घाइते पनि भएका छन ।

दाता परिवारका बल्लु यादव, सोनम यादवलाई सामान्य चोट लागेको छ भने हलका ढोका, र दुई-तीन वटा कुर्सीमा सामान्य क्षति पुगेको छ । तालाबन्दी र तनाव बढ्दै गएपछि सुरक्षाकर्मीलाई बोलाएका थिए । तर झडप भइरहँदा सुरक्षाकर्मीहरु मुखदर्शक बनेका थिए । इन्द्रदेव यादवका बुहारी रेणुकुमारी यादवलाई क्याम्पसले प्रमुख अतिथि बनाउने निर्णय गरेको थियो ।

क्याम्पसले प्रायः प्रत्येक वर्ष उनलाई प्रमुख अतिथि बनाउँदै आएको छ तर हामीहरुलाई अपमान गर्दै आएको हुँदा क्याम्पस प्रशासनलाई यस विषयमा पटक–पटक ध्यानाकर्षण गराउँदा पनि वास्ता नगर्दा हलमा तालाबन्दी गरेको धर्मदेवका छोरा बब्लु यादवले बताए । बल्लुको श्रीमती ललितादेवी यादवसहितले तालाबन्दी गरेका थिए ।

सो सम्बन्धमा पूर्वमन्त्री यादवले क्याम्पसलाई दान दिइसकेपछि त्यहाँ अधिकार(अंश) खोज्नुको कुनै औचित्य नरहेको भन्दै प्रमुख अतिथि बनाउने अधिकार क्याम्पसको रहेको बताए । धर्मदेवले मेरो पति अशोक यादवको हत्या गरेकोले हत्यारा भएको उनले बताइन् । उनका छोराहरु उपर पनि हत्याको आरोप छ । यस्तो हत्यारा अपराधी परिवारलाई मानसम्मान दिनु गलत हुने उनले बताइन् ।

सभाहलमा तालाबन्दी भएपछि दाता स्व. विन्देश्वरी यादवको शालिकमा अबिर, माला लगाउनुको साथै क्याम्पसका प्रयोगशाला, कक्षाकोठाको निरीक्षण, अवलोकन गरेर पूर्वमन्त्री यादव फर्किएका थिए ।

क्याम्पस प्रमुख सर्वेशचन्द्र मिश्रले क्याम्पसले दाता परिवारका दुबै पक्षलाई बराबर रुपमा मानसम्मान गर्दै आएको छ । उनीहरुलाई पनि प्रत्येक वर्ष क्याम्पस दिवसमा निम्तो दिने गरेको बताए । यो विषय उनीहरुबीचको विवाद पनि हो ।