मुक्तिनाथ विकास बैंकले कमायो एक अर्ब २२ करोड मुनाफा

काठमाडौं । विकास बैंकहरु मध्ये अग्रणी मुक्तिनाथ विकास बैंक लिमिटेडले रु. १ अर्ब २२ करोड रुपैयाँ सञ्चालन मुनाफा आर्जन गर्न सफल भएको छ । बैंकले आ.व.०७५/०७६ सम्ममा रु. ४६ अर्ब १३ करोड निक्षेप संकलन गरि रु.३७ अर्ब ९५ करोड कर्जा लगानी गर्दा उक्त मुनाफा आर्जन गर्न सफल भएको हो ।

समकालिन विकास बैंकहरुका माझमा यस विकास बैंकले हरेक बर्ष उत्साहजनक बृद्धि र उत्कृष्ट प्रतिफल कायम राख्दै आएको छ । बैंकले निक्षेपतर्फ गत आर्थिक वर्षको तुलनामा ५२ प्रतिशत र कर्जा प्रवाहमा पनि ५२ प्रतिशत कै बृद्धि कायम गरी सञ्चालन मुनाफा ३७ प्रतिशतले बृद्धि गर्न सफल भएको हो ।

बैंकको निष्कृय कर्जा अनुपात ०.०७ प्रतिशत कायम रहेको छ भने बैंकको प्रति शेयर आम्दानी रु २७.८४ रुपैया रहेको छ । बैंकले आफूलाई विकास बैंकको माझमा नियमित कारोबारबाट नै सञ्चालन मुनाफा रु १ अर्ब २२ करोड गरी निक्षेप र कर्जा तर्फपनि अग्रणी विकास बैंकको रुपमा आफूलाई स्थापित गर्न सफल भएको छ ।

गत वर्षहरुको उपलब्धिलाई निरन्तरता दिंदै आगामी वर्षहरुमा थप सेवा सुविधा बृद्धि गर्दै लैजाने लक्ष्य लिएको बैंकका प्रमुख सुचना अधिकारी तिलबहादुर गुरुङ्गले जानकारी दिएका छन् । हाल बैंकले ११८ शाखा कार्यालयबाट आफ्ना सेवाग्राहीहरुलाई आधुनिक बैंकिङ्ग र साना तथा लघु बैंकिङ्ग सेवा प्रदान गर्दै आइरहेको छ ।