होस्टल एसोसिएशनको नेतृत्वका लागि गिरी समूहको उम्मेदवारी घोषणा

५ भदौ,काठमाडौं । होस्टल व्यवसायीहरुको छाता संस्थाको रुपमा रहेको नेपाल होस्टल एसोसिएशनको केन्द्रीय कार्यसमितिका लागि गोविन्द गिरी नेतृत्वको समूहले उम्मेदवारी घोषणा गरेको छ । काठमाडौमा पत्रकार सम्मेलनमार्फत् उनीहरुले १२ सदस्यीय समूहसहित उम्मेदवारी घोषणा गरेका हुन् ।

वर्तमान महासचिव समेत रहेका गिरीले हरेक होस्टल व्यवसायीको दुःख र अफ्ट्यारोमा साथ दिएकाले आफ्नो समूहलाई व्यवसायीहरुले जिताउने दावी गरेका छन् । गिरी समूहले सार्वजनिक गरेको चुनावी घोषणापत्रमा व्यवसायीका हरेक समस्याको समाधानका लागि सँगसगै रहने, एसोसिएसनको संस्थागत विकास गर्ने र होस्टल व्यवसायको मर्यादा बढाउनेलगायतका कार्यहरु गर्ने प्रतिबद्धता जनाइएको छ ।

यही भाद्र ७ गते काठमाडौंमा हुन गईरहेको सातौं बार्षिक साधारणसभा तथा अधिवेशनका लागि झण्डै सात सय प्रतिनिनिधि छनौट भएका छन् । काठमाडौसहित ललितपुर, काभ्रे, चितवन, मोरङ गरी पाँच जिल्लाबाट प्रतिनिधिहरु छनौट भएका हुन् । एसोसिएसनको अहिले पाँच जिल्लामा मात्रै शाखा रहेको अध्यक्षका उम्मेदवार तथा वर्तमान महासचिव गिरीले जानकारी दिए ।

एसोसिएसनको बरिष्ठ उपाध्यक्षका लािग केदार कुमार थापा, महिला उपाध्यक्षका लागि ज्ञानु जोशी, महासचिवका लागि सुनिता बाटाजु, सचिवका लागि भीम भण्डारी र कोषाध्यक्षका लागि विभव पौडेलले गिरीको तर्फबाट उम्मेदवारी घोषणा गरेका छन् । त्यसैगरी सदस्यमा पारस विष्ट, द्रौपती वली, यशोदा थापा, बालकृष्ण गौतम, मिनादेवी अर्याल र हरि प्रसाद भेटवालले उम्मेदवारी दिन लागेका छन् ।

सचिवका उम्मेदवार भण्डारीले अहिलेको कार्यकालमा खेलेको अविभावकीय भूमिकाका कारण आफुहरुको समूहले जित्ने दावी गरे । निर्वाचनका लागि आज विहान ११ बजेदेखि दिउसो २ बजेसम्म उम्मेदवारी दर्ताको समय तोकिएको छ भने उम्मेदवारहरुको अन्तिम नामावली पनि आजै प्रकाशित हुनेछ ।

देशभरीको स्पष्ट तथ्यांक नभएपनि देशभरी झण्डै एक हजार होस्टलहरु रहेको र त्यसका लागि झण्डै एक अर्ब लगानी रहेको अनुमान गरिएको छ ।