चितवनमा प्रदर्शनकारी र प्रहरीबीच झडप

९ भदौ, चितवन । रवि लामिछानेको रिहाइको माग गर्दै आन्दोलनरत समर्थकहरुले भरतपुरको चौबिसकोठीमा पूर्वपश्चिम राजमार्ग अवरुद्ध गरेका छन् ।

प्रहरी हिरासतमा रहेका रवि लामिछानेको रिहाइको माग गर्दै दश दिनदेखि जारी आन्दोलनका क्रममा उनीहरुले आज सवारी साधनमाथि तोडफोडसमेत गरेको प्रहरीले जनाएको छ ।

भरतपुरको दूरसञ्चार रोड र चौबिसकोठीमा प्रदर्शनकारी र प्रहरीबीच झडप भएको छ । यसक्रममा प्रहरीले प्रदर्शनकारीमाथि अश्रुग्याँस प्रहार पनि गरेको छ ।

प्रदर्शनकारीहरुले टायर बालेर प्रदर्शन गरेका छन् भने यतिवेला राजमार्ग पूर्ण अवरुद्ध भएको छ । यसैबीच, प्रदर्शनकारीहरुले निषेधाज्ञाको वेवास्ता गर्दै नारायणगढदेखि भरतपुरको विभिन्न चोकचोकमा मोटरसाइकल र्‍याली गरेका छन् ।

शहरका चोकचोकमा ठूलो संख्यामा प्रहरीको उपस्थिति देखिन्छ । भित्री सडकसम्म सवारी साधनलाई प्रवेश निषेध गरिएको छ ।