तीजबाट महिलालाई एकताबद्ध भएर अघि बढ्न प्रेरणा मिल्ने : अध्यक्ष तिमिल्सिना

१६ भदौ, काठमाडौं । राष्ट्रियसभाका अध्यक्ष गणेशप्रसाद तिमिल्सिनाले हिन्दू नारीहरुको विशेष पर्व हरितालिका तीजले सम्पूर्ण महिलालाई एकताबद्ध भएर अगाडि बढ्न प्रेरणा मिल्ने विश्वास व्यक्त गरेका छन् ।

तीजको अवसरमा आज एक शुभकामना सन्देश जारी गर्दै उनले सम्पूर्ण नेपाली दिदीबहिनीमा सुख, शान्ति, समृद्धि, सुस्वास्थ्य र दीर्घायुको शुभकामना व्यक्त गरेका छन् । नेपाल जस्तो बहुसांस्कृतिक, बहुधार्मिक तथा बहुजातीय देशमा मनाइने विभिन्न चाडपर्वले आम नेपालीलाई एक सूत्रमा बाँध्न सहयोग गर्ने अपेक्षा लिएको अध्यक्ष तिमिल्सिनाले बताए ।

“चाडपर्वहरु मनाउँदा मौलिकतालाई जगेर्ना गर्दै निरन्तरता दिनु आवश्यक छ, तीजको पनि आफ्नै मौलिकता रहेको छ, तीज लक्षित गीतले समाज परिवर्तनमा महत्वपूर्ण भूमिका खेल्दै आएको स्मरण गर्न चाहन्छु”, अध्यक्ष तिमिल्सिनाद्वारा जारी सन्देशमा उल्लेख छ ।

उनले चाडपर्वहरु मनाउँदा भित्रिन सक्ने सामाजिक विकृतिप्रति सचेत हुँदै खर्चमा मितव्ययिता अपनाउन र पारिवारिक मिलन तथा सामाजिक सद्भाव बढाउने गरी पर्व मनाउन अनुरोध गरेका छन् ।