गौतम र पौडेल प्रधानमन्त्री ओलीलाई भेट्न सिंगापुर जाने

१६ भदौ, काठमाडौं। सत्तारुढ नेपाल कम्युनिस्ट पार्टी ‘नेकपा’का नेता बामदेव गौतम र महासचिव विष्णु पौडेल सिंगापुर जाने भएका छन् ।

 पार्टी अध्यक्ष एवं प्रधानमन्त्री केपी शर्मा ओलीलाई भेट्न दुबै नेता भोलि १ बजे सिंगापुरतर्फ प्रस्थान गर्ने कार्यक्रम छ ।भदौ ५ गते स्वास्थ्य उपचारका लागि सिंगापुर पुगेका ओलीको प्रधानमन्त्री ओलीको प्लाज्मा फेरेसिक प्रक्रियाबाट शरीरमा रहेको एन्टीबडी घटाउने अन्तिम उपचार हुँदैछ ।

यो उपचारअघि ओलीलाई भेट्ने र सँगै फर्किने योजनाका साथ दुबै नेता सिंगापुर जान लागेको समाचार स्रोत जानकारी दिएको छ ।

यता, प्रधानमन्त्री केपी शर्मा ओली बुधवार सातौं चरणको उपचार प्रक्रिया सकिएपछि शुक्रबार स्वदेश फर्किने कार्यक्रम रहेको छ । नेकपा संसदीय दलका कार्यवाहक नेता सुवास नेम्वाङलाई आइतबार साँझ फोन गरेर ओलीले आफू ठीकठाक रहेको सन्देश प्रवाह गरिदिन भन्दै शुक्रबार स्वदेश फर्कर्ने जानकारी गराएका हुन् ।

संसदीय काम कारवाही र विधेयकहरुको विषयमा जानकारी लिन प्रधानमन्त्री ओलीले नेम्वाङलाई फोन गरेकोको नेकपा स्रोतले बताएको छ ।

समाचार स्रोतकै अनुसार अन्य विधेयकहरु पनि सहमतिका आधारमा संशोधन प्रक्रिया अगाडि बढाइएको र कुनै चिन्ता नलिन आफूले प्रधानमन्त्रीलाई भनेको नेम्वाङको भनाइ छ ।