हुप्सेकोट गाउँपालिकामा ९० करोडको खानेपानी आयोजनाको वित्तीय सम्झौता

मिना कंडेल

९ असोज, नवलपुर । पूर्वी नवलपरासीको हुप्सेकोट गाउँपालिकामा जिल्लाकै सबै भन्दा ठुलो खानेपानी आयोजनाको निर्माणका लागि बिहिवार वित्तीय सम्झौता भएको छ । सो आयोजनाका लागि सम्झौता पत्रमा गाउँपालिका अध्यक्ष लक्ष्मीदेवी पाण्डे, आयोजनाका उपनिर्देशक विकेस बधानथाछे, नगर विकास कोषका तर्फबाट सुभाष पन्त र उपभोक्ता समितिका तर्फबाट अध्यक्ष मेकबहादुर पुलामी मगरले हस्ताक्षर गरि आयोजनाको निर्माण शुरु गरेका छन् ।

सहरी खानेपानी तथा सरसफाई आयोजना, आयोजना व्यवस्थापन कार्यालय, नगर विकास कोष, हुप्सेकोट गाउँपालिका र देउराली हुप्सेकोट सहरी खानेपानी तथा सरसफाई उपभोक्ता संस्था बीच वित्तीय सम्झौता भएको हो ।

जिल्लाको हुप्सेकोट गाउँपालिकाका जनतालाई प्रत्येक घरमा खानेपानी धारा पुरयाउने उद्देश्यले रु ९० करोडमा सो आयोजना निर्माण हुने गरि बिहिवार सम्झौता सम्पन्न भै कार्यक्रम शुरु भएको हुप्सेकोट खानेपानी तथा सरसफाई आयोजनाका अध्यक्ष मेकबहादुर पुलामी मगरले बताए । हुप्सेकोट गाउँपालिका वडा नं १, २, ३ र ४ का स्थानीयबासीले आगामी दुई बर्षमा स्वच्छ र सफा खानेपानी पाउने र त्यस खानेपानबिाट करीब २६ हजार जनता प्रत्यक्ष लाभन्बीत हुने हुप्सेकोट गाउँपालिकाका अध्यक्ष लक्ष्मीदेवी पाण्डेले बताइन् ।

हुप्सेकोट गाउँपालिकाका २६ हजार जनतालाई तीन हजार ६५२ धाराबाट खानेपानी पुरयाउने लक्ष्यका साथ शुरु भएको सो आयोजना जिल्लाकैै सबैभन्दा ठुलो आयोजना र नमुना आयोजनाका रुपमा रहेको गाउँपालिकाका अध्यक्ष पाण्डेले जानकारी दिइन् ।

सो आयोजनाका लागि स्थानीय उपभोक्ताबाट चार करोड ४४ लाख ९७ हजार, नगर विकास कोषबाट रु २२ करोड २४ लाख ८९ हजार र नेपाल सरकारबाट रु ६२ करोड २९ लाख ७० हजार गरि रु ९० करोड २२ लाख १३ हजारमा आयोजना दुई वर्षमा सम्पन्न हुने आयोजना उपभोक्ता समितिका अध्यक्ष मेक बहादुर पुलामी मगरले बताए । आयोजनाका लागि सरसफाई तर्फ रु एक करोड २२ लाख ५५ हजार छुटयाईएको छ । सो आयोजनाका लागि गिरुवारी खोला, पत्थर खोला र बेतही खोलाबाट खानेपानी ट्याकी बनाएर खानेपानी पुरयाईने लक्ष्यका साथ आगामी दुई बर्षमा हुप्सेकोट गाउँपालिकाका २६ हजार जनताले खानेपानी पाउने गाउँपालिका वडा नं ३ का वडाध्यक्ष छबिलाल मिधुन मगरले बताए ।