महरा प्रकरण फासफुस नहोस् : बाबुराम भट्टराई

१४ असोज, काठमाडौं । पूर्व प्रधानमन्त्री एवम् समाजवादी पार्टी नेपालका संघीय अध्यक्ष डा.बाबुराम भट्टराईले प्रतिनिधि सभाका सभामुख कृष्णबहादुर महराले राजीनामा दिएसँगै घटना फासफुस नहोस् भन्दै कानून अनुसारको न्याय निरूपण हुनुपर्ने बताएका छन् ।

मंगलवार सामाजिक सञ्जाल ट्वीटरमार्फत एक सन्देश जारी गर्दै उनले विगतमा महिला र दलितमाथि हुने गरेका अपराधका निष्पक्ष छानविन र कारबाही नभएको स्मरण गराउँदै महरा प्रकरण त्यसै हराउन नहुने बताएका छन् ।

उनले भनेका छन्, ‘सभामुख महराको राजीनामा पछि यो बलात्कार काण्डको स्वतन्त्र र निष्पक्ष छानविन होस् र कानून अनुसार न्याय निरूपण होस् ! विगतमा महिला र दलितमाथि हुने गरेका अपराधका निष्पक्ष छानविन र कार्यवाही भएका छैनन् ! मी-टू अभियानका आरोपीहरू कोही पनि दण्डित भएका छैनन् ! महरा प्रकरण पनि त्यस्तै फासफुस नहोस् !’