अमेरिका जाने डीभी खुल्यो, पासपोर्ट र हालसालै खिचिएको फोटो अनिवार्य

१६ असोज, काठमाडौं । सन् २०२१ को डाइभर्सिटी भिसा ‘डिभी’ कार्यक्रमका लागि आवेदन दर्ता बुधबारदेखि खुलेको छ ।

नेपालस्थित अमेरिकी राजदूतावासले दिएको जानकारी अनुसार बुधबार मध्याह्न १२ बजेदेखि अनलाइन आवेदन खुला भएको छ । कात्तिक १९ गते ९५ नोभेम्बर २०१९० सम्म आवेदन दिन पाइनेछ । यस वर्ष आवेदन फारम भर्दा पासपोर्ट नम्बर, पासपोर्टको म्याद र इमेल ठेगाना अनिवार्य गरिएको छ ।

एक व्यक्तिले एक पटक मात्र आवेदन दिन सक्नेछन् । एकभन्दा बढी पटक आवेदन फारम भर्ने व्यक्ति डीभीका लागि अयोग्य ठहरिने दूतावासले जनाएको छ ।

आवेदन फारम भर्न कुनै पनि शुल्क लाग्ने छैन । आवेदनमा आफ्ना पति–पत्नी र आवेदन दिने समय सम्ममा २१ वर्ष नपुगेका सबै अविवाहित सन्तानको विवरण राख्नुपर्छ । हालसालै खिचिएको फोटो हुनुपर्नेछ ।

अघिल्ला वर्षहरुमा डीभी फारममा प्रयोग गरिएको फोटो यस वर्षको आवेदनमा प्रयोग गरे अयोग्य ठहरिनेछ ।फारम भरिसकेपछि प्राप्त गरिएको कन्फरमेसन नम्बरलाई आवेदकले सुरक्षित राख्नु पर्नेछ ।

सोही आधारमा प्रकृया अघि बढ्नेछ । सन् २०२१ मा अमेरिकाले संसारभरिबाट ५५ हजार जनालाई डीभीमार्फत अमेरिका लैजाने छ ।