सिन्धुपाल्चोक बस दुर्घटना : मृत्यु हुनेको संख्या ११ पुग्यो

२४ असोज, सिन्धुपाल्चोक । दशैँ मनाएर काठमाडौं आउदै गरेको बस सिन्धुपाल्चोकमा दुर्घटनामा परेको छ । जिल्ला प्रहरी कार्यालय, सिन्धुपाल्चोकका अनुसार दुर्घटनामा मृत्यु हुनेको संख्या ११ जना पुगिसकेको छ ।

करिब ४० जना घाइते भएका छन् । घाइते २३ जनालाई  नेपाली सेनाको एमआई–१७ र अर्का एक निजी कम्पनीको हेलिकोप्टरबाट उद्दार गरेर काठमाडौं ल्याइएको छ । उद्धार गरेर काठमाडौं ल्याइएका उनीहरुलाई काठमाडौंको विभिन्न हस्पिटलमा भर्ना गरिएको छ ।

सिन्धुपाल्चोकको सुपाघाटबाट काठमाडौंतर्फ आउँदै गरेको बा २ ख २७१५ नम्बरको बस इन्द्रवाती गाउँपालिका १०, बडहरे झिल्के मोडमा शुक्रबार बिहान ९ः५५ बजे दुर्घटना भएको थियो । बसमा सवार ५ जनाको घटनास्थलमै मृत्यु भएको थियो भने एक जना अस्पताल ल्याउँदा ल्याउँदै र अन्य ५ जनाको धुलिखेल अस्पतालमा मृत्यु भएको थियो ।

मृत्यु हुनेमध्ये इन्द्रावती-९ की ४६ वर्षीय जुनादेवी लम्साल र इन्द्रावती-१० का २० वर्षीय गणेश तामाङको मात्रै सनाखत भएको छ । अन्यको पहिचान खुलाउने प्रयास भइरहेको प्रहरीले जनाएको छ ।

प्रहरीका अनुसार ग्रामिण सडकमा रहेको घुम्ती पार गर्ने क्रममा बस सडकबाट अन्दाजी ६० मिटर तल खसेको थियो । दूर्घटनाको कारणबारे प्रहरीले विस्तृत अनुसन्धान गरिरहेको जनाएको छ ।