एनआरएनएको विश्व सम्मेलन भोलिबाट सुरु हुँदै

२७ असोज, काठमाडौं । गैरआबासीय नेपाली संघ (एनआरएनए)को विश्वसम्मेलनको उदघाटन मंगलबारदेखि काठमाडौंमा सुरु हुने भएको छ । होटल ह्यातमा तीन दिनसम्म चल्ने सम्मेलनको राष्ट्रपति विद्यादेवी भण्डारीले मंगलबार बिहान ९ बजे उद्घाटन गर्ने कार्यक्रम तय भएको छ ।

केन्द्रीय समितिको नयाँ नेतृत्व समेत चयन गर्न लागेको सम्मेलनको पहिलो दिन दोहोरो नागरिकता, लगानी, सुरक्षा लगायत गैरआवासीय नेपालीका मुख्य मुद्दाबारे छलफल हुने छ ।

सम्मेलनको दोस्रो दिन संघको केन्द्रीय समितिको चुनाव हुनेछ र सम्मेलनको समापन प्रधानमन्त्री केपी शर्मा ओलीले गर्ने कार्यक्रम तय भएको छ । सम्मेलनमा विश्वका ८० शाखा मध्ये ६० भन्दा बढी शाखाका प्रतिनिधिहरु सामेल हुँदैछन् । सम्मेलनमा करिब १८ सय जनाले भाग लिने आयोजकले जानकारी दिएको छ ।

यसपटक संघको अध्यक्षका लागि वर्तमान उपाध्यक्ष कुल आचार्य र कुमार पन्तले उम्मेद्वारी दिने तयारी गरेका छन् भने महासचिवमा वर्तमान सल्लाहाकार डा.हेमराज शर्मा लगायत चारजनाले उम्मेद्वारी दिने तयारी गरेका छन् । डा.शर्माले जीवा लामीछाने संघको अध्यक्ष भएका बेला प्रवक्ताको जिम्मेवारी सम्हालेका थिए ।

संघको यसअघि जस्तै यसपटक पनि विद्युतीय मतदान हुनेछ । संघले आगामी दुई वर्षका लागि नेतृत्व चयन गर्न लागेको हो । संघको विश्व सम्मलेनमा ४२ जना उम्मेदवारहरु विजयी बन्ने निर्वाचन समितिले जनाएको छ ।

निर्वाचन कार्यतालिका