निवर्तमान सभामुख महरालाई आज अदालत लगिने

२८ असोज, काठमाडौं । यौन दुव्यर्वहारको आरोप लागेका निवर्तमान सभामुख कृष्णबहादुर महरालाई मंगलबार काठमाडौं जिल्ला अदालत उपस्थित हुने भएका छन् ।

थुनामा राखेर थप अनुसन्धान गर्न म्याद थपका लागि महरालाई अदालत हाजिर गराउन लागिएको हो । दशैँ बिदा र विभिन्न सार्वजनिक बिदाका कारण अदालत उपस्थित गराउन नसकिएपछि मंगलबार अदालतमा उपस्थिति गराएर म्याद थप्ने प्रहरीको तयारी छ ।

उच्च रक्तचाप र मुटुको नियमित स्वास्थ्य परीक्षणका लागि महरालाई गएको बिहीबारदेखि थापाथलीमा रहेको नर्भिक अस्पतालमा भर्ना गरिएको छ ।

पीडित भनिएकी महिला रोशनी शाहीले किटानी जाहेरी दिएपछि अदालतका न्यायाधीश ब्रजेश प्याकुरेलको एकल इजलासले महरालाई पक्राउ पुर्जि जारी गरी अनुसन्धान गर्न आदेश दिएको थियो ।

निवर्तमान सभामुख कृष्णबहादुर महराको बयान दशैँभरि रोकिएको हो । महानगरीय प्रहरी परिसर काठमाडौंका प्रमुख एसएसपी उत्तमराज सुवेदीका अनुसार दशैँ बिदामा सरकारी वकिलको कार्यालय बन्द हुने भएकाले बिदा सकिएपछि मात्र महराको बयान आजबाट सुरु हुने भएको हो ।

काठमाडौंको सरकारी वकिल कार्यालय २६ गते आइतबारबाट खुल्ने भएपनि आइतबार सार्वजनिक बिदा भएकाले सोमबारबाट मात्र अदालत खुलेका छन् ।

महराविरुद्ध जबरजस्ती करणी उद्योग र महिला हिंसा आरोपमा मुद्दा चल्ने बुझिएको छ । मुलुकी अपराध संहिताअनुसार उक्त आरोप प्रमाणित भए महरालाई तीन वर्ष ६ महिनादेखि ५ वर्षसम्म कैद हुनसक्छ ।