एनआरएनएको सम्‍मेलन स्थगित, मतदाता आक्रोशित

२९ असोज काठमाडौं । गैरआवासीय नेपाली संघ ‘एनआरएनए’को नयाँ नेतृत्व चयनका सुरु भएको मतदान केही बेरमै स्थगित भएको छ।

भोटिङ सिष्टममा गडबडि आएपछि निर्वाचन स्थगित गर्नु परेको निर्वाचन समितिले जनाएको छ। निर्वाचन समितिका अनुसार एनआरएनएको निर्वाचन भोलि बिहान १० बजेबाट सुरु हुनेछ।

यता, निर्वाचन स्थगित भएपछि मतदाताहरु आक्रोशित भएका छन्। उनीहरुले मतदान आजै हुन पर्ने र भोलि निर्वाचनमा जसले जिते पनि आफूहरुले नमान्‍ने बताएका छन्। उनीहरुले मतदानमा धाँधली भएको आरोप लगाउँदै मतदान गर्न नपाए निर्वाचन नै खारेज गर्नु पर्ने माग गरेका छन्।

साँझ ५ बजेदेखि मतदान हुने भनिए पनि दर्ता गर्ने, दावी बिरोध लगायत काम ढिला हुँदा मतदानमा चार घण्टा पछि मात्रै सुरु भएको थियो। मतदान ढिलो भएपछि मतदान स्थलमै मतदाताहरुले नाराबाजी गरेका थिए। नाराबाजी सुरु भएपछि प्रहरीले मतदान स्थलमा हस्तक्षेप गरेको थियो।

संघको मंगलबारदेखि नवौँ अन्तर्राष्ट्रिय सम्मेलन तथा महाधिवेशनबाट केन्द्रीय समितिको ४२ जना पदाधिकारीको निर्वाचित हुनेछन्।

८१ मुलुकमा शाखा रहेको एनआरएनएको अध्यक्षका लागि वर्तमान उपाध्यक्ष कुमार पन्त र कुल आचार्य प्रतिस्पर्धामा उत्रिएका छन् भने, पन्त जर्मनीमा व्यवसाय गरिरहेका छन् भने आचार्य बेलायतमा व्यवसाय गरिरहेका छन्।