गण्डकी प्रदेशको मुख्य लाईफलाईनका रुपमा नवलपुर :– मुख्यमन्त्री गुरुङ्ग

मिना कंडेल

३० असोज, काठमाडौं । गण्डकी प्रदेशका मुख्य मन्त्री पृथ्बी सुब्बा गुरुङ्गले नेपाल भ्रमण बर्ष २०२० भ्रमण बर्षमा लाखौं पर्यटक भित्रयाउन प्रदेश सरकार लागि परेको बताएका छन् । पूर्बी नवलपरासीको कावासोती नगरपालिका १० रतवलमा चिलाहा रतवल सामुदायिक ग्रामीण होमस्टेको विहिवार एक समारोह बीच उद्दघाटन गर्दै मुख्य मन्त्री गुरुङंले सो कुरामा जोड दिएका हुन् ।

उनले प्रदेश सरकार नवलपुरको बिकासका लागि लागि परेको भन्दै यहाँका हरेक विकासमा प्रदेश सरकारको मुख्य सहयोग हुनेमा पनि विश्वस्त रहन आग्रह गरेका थिए । गण्डकी प्रदेशको मुख्य लाईफलाईनका रुपमा रहेको यो जिल्लाको बिकास सँग संगै प्रदेशको बिकास सम्भब हुने भएकाले नवलपुरको बिकास का लागि प्रदेश सरकार अत्यन्त सम्बेदनशील भएर लागेको बताए ।

नवलपुरमा संचालनमा आएका सात वटा होमस्टेले यहाँ पर्यंटक ल्याउनका लागि सबै भन्दा ठुलो भूमिका रहनेमा जोड दिए । उनले नवलपुरमा रहेको नारायणी नदी आसपास रहेका होमस्टे र होटलहरुले यहाँको पर्यटनका लागि सहज हुने भएकाले सबैले भ्रमण बर्षलाई लक्षित गरि अघि बढेमा गण्डकी प्रदेशमै सबै भन्दा बढि पर्यटक भित्रयाउन सकिने बताए । मुख्य मन्त्री गुरुगंले गण्डकी प्रदेश लाई समृद्ध प्रदेश बनाउन नवलपुर जिल्लाको भूमिका ठुलो हुने भएकाले समृद्धिको हिसाबले पनि यो जिल्लाको बिकास अपरिहार्य रहेकोमा जोड दिए । यो जिल्लालाई मुख्य औद्योगिक जिल्लाका रुपमा अघि बढाउन सकियो भने यो प्रदेशको बिकास र आर्थिक प्रगतिको हिसाबले अन्य प्रदेशहरु भन्दा अघि आउने उनले बताए ।

गण्डकी प्रदेश सरकारको घरबास अनुदान सहयोग र स्थानीयको सक्रियतामा यहाँ रहेका १३ घरमा घरबास स्थापना गरिएको छ । थारु समुदायको बसोबास रहेको चिलाहा रतौल क्षेत्रमा घरबास स्थापना गरिएको हो ।

घरबास स्थापनाका लागि गण्डकी प्रदेश सरकारले रु. १५ लाख अनुदान सहयोग उपलब्ध गराएको कावासोती नगरपालिका वडा नम्बर–१०,का वडा अध्यक्ष टेक नारायण महतोले बताए । प्रदेश सरकारको लागतमा सास्कृतिक भवन निर्माण गरिएको छ । १३ वटा घरमा स्थापना गरिएको घरबासमा १०४ जनासम्म एकै पटक बस्न सक्ने वडा अध्यक्ष महतोले बताए । चिलाहा रतौल सामुदायिक ग्रामिण घरबासको रुपमा थारु समुदायले घरबास स्थापना गरेका हुन ।

मध्यवर्ती क्षेत्र भएकाले यहाँ वन्यजन्तु अवलोकनकालागि आन्तरिक तथा बाह्य पर्यटक आउने गरेका छन् । यहाँ आउने पर्यटकलाई लक्षित गरी घरबास स्थापना गरिएको उनले बताए । घरबासको माध्यमबाट यस क्षेत्रका समुदायको आर्थिक विकासमा सहयोग पुग्ने वडा अध्यक्ष महतोले बताए । घरबासमा मुख्य गरेर थारु परिकार, थारु नृत्यका साथै थारु संस्कृति प्रमुख आकर्षण रहने उनले बताए । घरबासमा आउने पाहुनाहरुले जङ्गल सफारी, डुङ्गा सयरको आनन्द लिन पाउने वडा अध्यक्ष महतोले बताए ।

भेषराज महतोको अध्यक्षतामा भएको कार्यक्रममा संघीय सांसद तिलक महत, प्रदेशका उद्योग ,पर्यटन मन्त्री बिकास लम्साल, प्रदेश सांसदहरु रोशनबहादुर गाहा मगर, ओमकला गौतम, जनकलाल श्रेष्ठ, नेकपाका केन्द्रीय सदस्य किसान शर्मा गैरे कांग्रेसका जिल्ला सचिव बालकृष्ण घिमिरे, कावासोती नगरपालिकाका उपप्रमुख प्रेमशंकर मर्दनियाँ लगायतले नवलपुरको विकासमा प्रदेश सरकारले ध्यान दिनुपर्नेमा जोड दिएका थिए ।