विप्लवका दाजुसहित पक्राउ पर्ने २१ जना अदालतमा

१ कात्तिक काठमाडौं । विप्लव नेतृत्वको नेपाल कम्युनिष्ट पार्टीको राप्ती ब्यूरो बैठकबाट विप्लवका दाजुसहित पक्राउ परेका २१ जना नेता कार्यकर्तालाई जिल्ला प्रहरी कार्यालय दाङले सरकारी वकिलको कार्यालयमा पठाएकाे छ ।

म्याद थपका लागि दाङ देउखुरी जिल्ला अदालत पेश गर्नु पूर्व उनीहरुलाई सरकारी वकिलको कार्यालयमा लगिएको प्रदेश नम्बर ५ का प्रहरी प्रमुख प्रहरी नायव महानिरीक्षक डीआईजी सुरेशबिक्रम शाहले बताए ।

शाहका अनुसार बिहान ११ बजेबाट पक्राउ गरिएका सबैलाई घोराहीमा रहेको सरकारी वकिलको कार्यालयमा लगिएको हाे । अहिले उनीहरुको सरकारी वकिलको कार्यालयमा पालैपालो बयान लिने काम भैरहेको छ ।

सरकारी वकिलको कार्यालयमा बयानपछि उनीहरुलाई थप अनुसन्धानका लागि म्याद थपको मागसहित जिल्ला अदालत पेश गरिने छ । बुधबार मध्यरातमा दाङको राजपुर–४ मुंग्रेठा खोलाबाट प्रहरीले केन्द्रीय सदस्यसहित २१ जनालाई पक्राउ गरेको थियो ।