पर्यटकलाई उपहार : धुलो र धुवाँ !

प्रकाश परिष्कार

४ कार्तिक, रामेछाप । यतिबेला रामेछाप जिल्ला सदरमुकाम मन्थली पर्यटकमय भएको छ । सगरमाथा आरोहणको सिजन भएको भएर पनि मन्थली पर्यटकले भरिभराउ भएको हो । सगरमाथा आरोहणको सिजन सुरु भए सँगै यो वर्ष मात्रै अधिक पर्यटकहरु मन्थलीमा भित्रिएका छन् ।

पर्यटकहरुको यो आवागमनले मन्थलीका होटल व्यवसायमा भने उल्लेख्य प्रभाव परेको रामेछाप होटल व्यवसायी संघका अध्यक्ष शेखरमान श्रेष्ठ बताउँछन् । ‘पछिल्लो समय पर्यटकहरुको यो आगमनले रामेछापको होटल व्यवसायमा कस्तो प्रभाव परेको छ ?’ भनेर हामीले रामेछाप होटल पर्यटन व्यवसायी संघका अध्यक्ष श्रेष्ठसँग सोधेका थियौं ।

सो सवालमा उनी भन्छन्, ‘हामीले सोचेको जस्तो सकारात्मक र उत्साहजनक प्रतिफल पाउन सकिएको छैन । पर्यटकहरु आफ्नो उडान ढिलो हुने सम्भावना पछि होटलका कोठाहरु बुकिङ्ग गर्ने तर फेरि उडानको निष्चित भएपछि बिना जानकारी हिँडिदिँदा होटलका कोठाहरु रित्तै रहने अवस्था छ । यस्तो अवस्थामा होटल व्यवसायमा उचित प्रतिफल पाउन सकिएको छैन ।’

मन्थलीका होटल र पर्यटक तथा पर्यटन व्यवसायीहरुको बिचमा उचित समन्वयको अभावको कारणले यस्तो अवस्थाको सिर्जना भएको श्रेष्ठ स्वीकार्छन् । आगामी दिनमा सबै होटलहरुको तर्फबाट पर्यटकसँग समन्वय गर्न सक्ने २-३ जना कर्मचारी खटाएर होटल र पर्यटकको बिचमा समन्वय गराउने योजना रहेको उनले बताएका छन् । उता पर्यटकको पिडा पनि उस्तै छ ।

स्वीडेनबाट सगरमाथाको आरोहणका लागि आएका जोन म्याडेट क्रिस्टल मन्थलीको बसाई असाध्यै कष्टकर भएको बताउँछन् । होटलहरुको बारेमा जानकारी नभएको, भौगोलिकताका कारणले होटलको लोकेशन थाहा नभएको, यहाँको फोहोर र धुलोको कारणले पनि समस्या पारेको क्रिस्टल बताउँछन् ।

क्रिस्टल सँगै रहेका उनका अर्का साथी रुइपे नागोस्ली भने यो सम्बन्धमा अलग प्रतिक्रिया दिन्छन् । उनी भन्छन्, ‘डेभ्लपिङ्ग सेक्टरहरुमा सानातिना समस्या भनेका त भइहाल्छन् । हामी सगरमाथासम्मको डेन्जर यात्रामा निस्किएका पर्यटक यहाँको सानोतिनो समस्यामा मन दुखाउँदैनौं । हामी धुलो र दुःख पचाउँछौं’ उनले हाँस्दै भने ।

इतिहासमा नै धेरै उडान मन्थलीबाट

सगरमाथाको आरोहरणका लागि लुक्ला जाने पर्यटकको चाप यतिबेला मन्थली विमानस्थलमा पनि कम सानो छैन । दैनिक सरदर ३० देखि ३५ उडान हुने मन्थली विमानस्थलमा गत असोज १४ गतेदेखि २२ गते सम्म २ सय ९३ वटा उडान नभएका छन् ।

मन्थली विमानस्थलका प्रमुख अमित चौरसियाले दिएको जानकारी अनुसार गत असोज २० गते ६८ वटा उडान भए, जो यस विमानस्थलको इतिहासमा नै सबैभन्दा धेरै उडान हो । लुक्लाको मौसम खराब भएका कारण असोज १९ गते भने यस विमानस्थलबाट कुनै पनि उडान हुन नसकेको चौरसियाले नेपाल बहसलाई जानकारी दिए ।

यसैबिच, सीता एयरको विमान ठूलो दुर्घटनाबाट जोगिएको छ । शनिबार बिहान ८ः३० बजे रामेछापको मन्थलीबाट सोलुखुम्बुको तेञ्जिङ हिलारी विमानस्थल लुक्लातर्फ उडेको उक्त ट्वीनटर विमान दुर्घटनाबाट जोगिएको हो । नागरिक उड्डयन कार्यालय रामेछापका प्रमुख चौरसियाका अनुसार विमानको इन्जिनभित्रै चरा पसेको थियो ।

उड्ने तयारीमा रहेको विमान धावनमार्गको करीब ७५ प्रतिशत भाग पार गरेपछि चरा ठोक्किएको र फरक आवाज आएको विमानस्थल कार्यालयले जनाएको छ । चालक दललाई चरा ठोक्किएको विषयमा तत्काल जानकारी भएकाले सोही विमानस्थलमा आकस्मिक अवतरण गराइएको उनले जानकारी दिए ।

तीन चालक दलका सदस्यसहित १३ विदेशी पर्यटक यात्रु लिएर उडेको सीता एयरको ९ एन–आई–ई विमान सकुशल अवतरण सफल भएको बताइएको छ । यसरी विमानको इन्जिनभित्रै चरा पसे पनि सकुशल अवतरण गराइएकाले यसलाई सामान्यरुपमा लिइने विमानस्थल कार्यालयले जनाएको छ ।